Luiza Gega shkëlqen në start duke u kualifikuar në finale të garës së 3000 metrave me pengesa në Evropianin e Atletikës që po zhvillohet në Mynih.

Atletja shqiptare garoi në baterinë e parë duke e kaluar e para vijën e finishit me kohën 9’30”93. Një garë e dominuar nga 33-vjeçarja e cila fillimisht qëndroi me grupin, për të nisur shkëputjen në pjesën e dytë, duke mos pasur rivale.

Atletja shqiptare, e renditur e pesta në botë në këtë disiplinë një muaj më parë në botëror, konsiderohet favorite për medalje në finalen që do të zhvillohet më 20 gushtit. Në botëror, Gega ishte atletja më e mirë nga Europa, ndaj shanset për një medalje të artë janë të mëdha.
(BalkanWeb)