Manchester United nuk po zhvillon një sezon aspak të mirë dhe rrezikon pjesëmarrjen në edicionin e ardhshëm në Champions League. Në fakt, objektivi i vetëm për të cilin luftojnë Djajtë e Kuq është vendi i katërt në renditjen e Premier League, i cili është katër pikë larg.
Drejtuesit e klubit kanë filluar ndërkohë kërkimet për të gjetur zëvendësuesin e Ralf Rangnick në drejtim të ekipit. Trajneri gjerman, siç dihet, do të lërë vendin e trajnerit për të marrë atë të këshilltarit brenda klubit.
Sky Sports ka bërë të ditur se Manchester United po vlerëson katër emra për sezonin e ardhshëm. Emrat në listën e drejtuesve të klubit anglez janë ato të Mauricio Pochettino, Erik ten Hag, Julen Lopetegui dhe Luis Enrique.
Bie në sy mungesa e Thomas Tuchel, i cili mund të largohet nga Stamford Bridge për shkak të situatës së vështirë në të cilën ndodhet Chelsea për shkak të sanksioneve të vëna nga qeveria angleze.
(BalkanWeb)