Policia e Elbasanit jep detaje për arrestimin e komisionerit Oltion Bajrami, i shpallur në kërkim pak ditë më parë, për manipulim të rezultatit të zgjedhjeve të 25 prillit 2021.

Policia njofton se numëruesi Bajrami, së bashku me shtatë kolegët e tjerë nga PD, PS e LSI, ku gjashtë prej tyre u arrestuan atë ditë dhe u liruan sot nga gjykata, ndërsa një tjetër ndodhet ende në kërkim, kanë falsifikuar materialet zgjedhore të procesit zgjedhor.

Njoftimi i policisë:

Falsifikoi materialet zgjedhore të procesit zgjedhor të datës 25.04.2021, vihet në pranga edhe 1 shtetas tjetër (numërues votash), i shpallur në kërkim.

Specialistët për Hetimin e Krimit Ekonomik dhe Financiar në Drejtorinë Vendore të Policisë Elbasan bënë ekzekutimin e masës së sigurisë “Arrest në burg”, për veprën penale “Falsifikimi i materialeve zgjedhore dhe i rezultatit të zgjedhjeve”, për shtetasin:

O. B., 37 vjeç, banues në fshatin Karkavec, Prrenjas.

Nga veprimet hetimore dyshohet se ky shtetas, në bashkëpunim me 6 shtetas të tjerë (të ndaluar më parë), të cilët kanë patur si detyrë numërimin e votave, gjatë procesit zgjedhor të datës 25.04.2021, ka shënuar në tabelat e rezultatit, të dhëna të ndryshme nga ato të fletëve të votimit, me qëllim favorizimin e kandidatëve të subjekteve zgjedhore.

Materialet hetimore i kaluan Prokurorisë Elbasan, për veprimet e mëtejshme.

(BalkanWeb)