Listë Serbe ka filluar konsultimet me presidentin e Serbisë, Aleksander Vuçiç, për hapat e mëtejshëm sa i takon marrëveshjes me Kosovën. Kryetari i Listës Serbe, Goran Rakiç tha se institucionet e Kosovës po tregohen pasive karshi sulmeve të fundit ndaj serbëve në të gjithë territorin e vendit.
“Sulmet e fundit ndaj serbëve dhe pronave të tyre në territorin e Kosovës, edhe ndaj fëmijëve dhe grave, pasiviteti i institucioneve të Kosovës, mosndëshkimi i krimit dhe sjellja injoruese ndaj tyre, na kanë shtyrë që të fillojmë konsultimet me shtetin tonë dhe me presidentin Vuçiç”, është shprehur Rakiç. Rakiç përmendi edhe deklaratat e përfaqësuesve të Bashkimit Evropian në Kosovë si një arsye tjetër se pse kjo Listë duhet të konsultohet edhe me Beogradin.
“Deklaratat e përfaqësuesve të BE-së, papërgjegjshmëritë e tyre për ndërprerjen e procesit të kthimit të serbëve në Kosovë, mosimplementimi i marrëveshjeve, kërkojnë që ne si përfaqësues legjitimë të serbëve të Kosovës, të konsultohemi me Serbinë dhe presidentin”, u shpreh Rakiç. Lista Serbe ka paraqitur tërheqjen nga koalicioni qeverisës qysh pas arrestimit të Marko Gjuriçit në Kosovë, ani pse kjo Listë po vazhdon të mbajë postet ministrore.
(BalkanWeb)