TIRANË

Partia Agrare Ambjentaliste ka reaguar përmes një deklarate shpërndarë mediave lidhur me marrëveshjen e nënshkruar me Shtetet e Bashkuara të Amerikës për vlerësimin e kuadrit rregullator teknik dhe komercial të futjes së gazit të lëngshëm natyror (LNG) në Shqipëri. Për PAA kjo marrëveshje

Rrit sigurinë e energjisë si kolona kryesore e sigurisë kombëtare, diversifikon burimet e energjisë duke mbrojtur Shqipërinë nga krizat e mungesës së energjisë dhe luhatjeve të çmimeve, integron ekonominë shqiptare në rrjetet rajonale dhe europiane të zhvillimit duke ndihmuar zhvillimin e qëndrueshëm dhe me ritme më të larta.

“Ky bashkëpunim me SHBA dhe BE lehtëson vendim-marrjet gjeostrategjike të Shqipërisë dhe të Ballkanit Perëndimor. Krijimi i opsioneve alternative konkuruese në fushën e energjisë, telekomunikacionit, vaksinave nga bashkëpunimi me partnerët strategjikë të BE dhe SHBA, është strategjia më produktive në bashkëpunimin gjeostrategjik” thuhet në deklaratë ku ndër të tjera PAA mbështet ofrimin në ekonominë shqiptare të kompanive konkuruese nga vendet perëndimore me standarte të larta ndaj ambientit, me profil të qartë të përgjegjësive sociale dhe në edukimin publik lidhur me sfidat kombëtare e globale të ngrohjes globale.

“PAA thekson se partneriteti strategjik me BE dhe SHBA është partneritet i mbi 90% të kombit shqiptar.
Kjo është garanci më e madhe për këtë prioritet kombëtar dhe partneritet strategjik.”- përfundon deklarata e PAA shpërndarë mediave.

(BalkanWeb)