Nuk është një krizë e momentit siç po pretendohej në disa media. Blero Muharremi dhe Afrona Dika kanë ndarë përfundimisht rrugët dhe këtë e konfirmuan në heshtje.

Ata kanë hequr njëri-tjetrin nga lista e personave që ndjekin në Instagram, duke konfirmuar kështu se martesa e tyre ka marrë fund. Dyshja fillimisht fshiu vetëm fotot e përbashkëta por vijoi të ndiqej në këtë rrjet sociale. Para disa ditësh, këngëtari ishte në Zvicër ku pati dyshime se mund të jetë takuar me Afronën dhe sqaruar. Por, pas këtij veprimi nuk ka më vend për dyshime.

Dyshja nuk ka reaguar rreth lajmeve të ndarjes. Pak kohë më parë, Afrona vendosi të merrej me biznes, ku hapi edhe një qendër estetike në Zvicër, ku edhe jeton prej kohësh. Ajo që ra në sy në inaugurimin e kësaj klinike, ishte pikërisht mungesa e këngëtarit. Krisja mes të dyve në atë periudhë kishte nisur, duke mos pasur shumë komunikim me njëri-tjetrin. Teksa bashkëshortja e tij angazhohej me biznesin e ri, Blero vijonte me karrierën e tij në muzikë, duke zgjedhur të qëndrojë larg realitetit të ri të bashkëshortes së tij.

Grindjet e tyre të shpeshta, shkak edhe largësia, kanë sjellë edhe ndarjen e tyre. Nuk dihet nëse kjo ndarje është një sherr mes të dyve, apo do të vijojnë edhe me hapat ligjorë për zgjidhjen e martesës. Blero dhe Afrona u martuan në shtator të 2019-ës, në një ceremoni madhështore në Lezhë. Mirëpo edhe pas martesës ata vijuan të jetonin të ndarë, Blero në Kosovë dhe Afrona në Zvicër.