Në përvjetorin e dytë të nisjes së konfliktit në Sudan, Sekretari i Përgjithshëm i OKB-së Antonio Guterres dha një pasqyrë të zymtë të situatës, duke theksuar se vendi është në krizë të thellë dhe civilët po mbajnë barrën më të rëndë. Ai dënoi ashpër sulmet ajrore dhe bombardimet që kanë goditur jo vetëm objektiva ushtarake, por edhe spitale, shkolla, tregje dhe kampe për të zhvendosurit, duke përfshirë edhe vendet e shenjta.
Ai ngriti alarmin për dhunën seksuale të përhapur, veçanërisht ndaj grave dhe vajzave, dhe shkeljet serioze të të drejtave të njeriut nga të dyja palët në konflikt. Guterres theksoi se pasojat humanitare janë të papara ndonjëherë: afro 12 milionë persona janë detyruar të largohen nga shtëpitë, duke krijuar krizën më të madhe të zhvendosjes në botë, me mbi 3.8 milionë që kanë kaluar kufijtë e Sudanit.
Gjysma e popullsisë, rreth 25 milionë njerëz, përballen me uri të theksuar, ndërsa uria tashmë është raportuar në pesë rajone dhe rrezikon të përhapet më tej. Pavarësisht ndihmës së ofruar për mbi 15 milionë persona vitin e kaluar, situata mbetet kritike për shkak të përshkallëzimit të luftës, pengesave administrative dhe mungesës së fondeve.
Sistemi shëndetësor dhe arsimor është në prag kolapsi, me shumicën e spitaleve jashtë funksionit dhe miliona fëmijë që nuk mund të ndjekin shkollën. Sekretari i Përgjithshëm kërkoi që palët në konflikt të zbatojnë zotimet e tyre sipas marrëveshjes së Jeddah-s dhe të garantojnë hetime të pavarura për të gjitha shkeljet e raportuara.
Ai gjithashtu kërkoi ndalimin e çdo ndërhyrjeje të huaj dhe theksoi rëndësinë e një procesi politik gjithëpërfshirës për të parandaluar përçarjen e mëtejshme të vendit. Sudani, tha ai, mbetet një përparësi e lartë për Kombet e Bashkuara, dhe i dërguari i tij i posaçëm, Ramdan Lamamra, vazhdon përpjekjet për të mbështetur popullin sudanez në ndërtimin e një të ardhmeje të përbashkët.
“Populli i Sudanit nuk duhet të harrohet nga bota”, përfundoi Guterres, duke i bërë thirrje komunitetit ndërkombëtar të veprojë për t’i dhënë fund kësaj lufte shkatërruese.
