Gjykata e Tiranës ka marrë vendimin në lidhje e masën e sigurisë për personat e akuzuar për mashtrime me skemën e TVSH.

Gazetarja Klodiana Lala bën me dije se gjykata vendosi që për katër të akuzuar të mbetet në fuqi masa e sigurisë arrest me burg, për dy të akuzuar është vendosur masa “Arrest shtëpie”, ndërsa i akuzuar Anxhelo Ruçi ka marrë masën e sigurisë “Detyrim paraqitje”.

Masat e sigurisë sipas vendimit të gjykatës:

Amarildo Hasrama, vijim i masës së sigurisë “Arrest me burg”

Besim Ruçi, vijim i masës së sigurisë “Arrest me burg”

Anxhelo Ruçi zëvendësimi i masës së sigurisë “Arrest me burg” me “Detyrim paraqitje”.

Bledar Gupe zëvendësim i masës “Arrest me burg” me “Arrest shtëpie”

Xhersi Sulaj zëvendësimi i masës “Arrest me burg” me masën e sigurisë “Arrest shtëpie”

Ajet Aluku, vazhdim i masës së sigurisë “Arrest me burg”

Nelit Mihola vazhdim i masës së sigurisë “Arrest me burg”

Kujtojmë se Prokuroria e Tiranës nisi dy ditë më parë hetimet për 13 subjekte me aktivitet të ndryshëm në kryeqytet, pasi dyshohet përmes një skeme mashtrimi me TVSH-në i kanë shkaktuar shteti një dëm ekonomik mbi 3 milion Euro.

Sipas njoftimit zyrtar, dyshohet se në këtë aktivitet kriminal janë të përshirë edhe zyrtarë, për të cilët vijon hetimi.

“Prokuroria pranë Gjykatës së Shkallës së Parë Tiranë, në bashkëpunim të ngushtë me Drejtorinë e Hetimit Tatimor pranë Drejtorisë së Përgjithshme të Tatimeve dhe me Drejtorinë Vendore të Policisë Tiranë, në kuadër të Procedimit Penal Nr.1054 të vitit 2020, pas një pune disa mujore me metoda speciale të hetimit bënë të mundur ekzekutimin e Vendimit nr.1981 Regj.Them. datë 24.09.2022 të Gjykatës së Rrethit Gjyqësor Tiranë, e cila ka caktuar masë sigurimi “arrest në burg” ndaj 13 shtetasve si dhe masën e sigurisë “detyrim për paraqitje” ndaj 4 shtetasve, të lidhur ngushtë me subjektet fiktive “No-El Construction” me nipt L72302057R, “G.S Construction” me nipt M01704017D, “Fam Construksion” me nipt L81408017V, “Tirana Universal Construksione me nipt L81721022Q, “Glob Construksion”, me nipt M21416014J, “Fredi 2021”, me nipt M11505007T, “Xhersi 2021”, me nipt M11705012P, “Aluku Grup”, me nipt M01922011F, “Joam”, me nipt M12315033I, si dhe të lidhur ngushtë me subjektet përfituese “Mihola”, me nipt L81616001M “E.L.2020 construksion”, me nipt M01420028U, “Amarildo Hasrama”, me nipt L61410014F, “Priam 20”, me nipt M02006001I.

Sa më sipër, nga analizimi dhe studimi i të dhënave të shoqërive objekt hetimi, rezulton se kanë funksionuar si furnizuese, kanë lëshuar fatura fiktive duke mos kryer asnjë blerje dhe duke mos ushtruar në asnjë moment aktivitet ligjor. Këto fatura fiktive janë injektuar në mënyrë direkte në shoqëri tregtare që operojnë në fusha të ndryshme, në vlerën totale 1,257,082,590 lekë, duke i shkaktuar shtetit një dëm finaciar në TVSH dhe TF, afërsisht 300,000,000 lekë, këto të fundit me kontabilizimin e kësaj vlere kanë ulur pagesën e TVSH mujore, si dhe duke rritur fiktivisht shpenzimet vjetore kanë ulur normën e TF.

Këto subjekte në bashkëpunim me njëri tjetrin kanë konsumuar elementë të veprës penale “Skemë Mashtrimi në lidhje me Tatimin mbi Vlerën e Shtuar dhe “Bashkëpunimit”, parashikuar nga nenet 144/a dhe 25 e Kodit Penal. Nga ky aktivitet kriminal, shtetasit nëpërmjet subjekeve fiktive kanë mundur të përfitojnë nga mos pagimi i detyrimeve tatimore dhe përfitimi i tyre në mënyrë të kundraligjshme, duke shkaktuar një dëm monetar dhe financiar shtetit në vlerën mbi 3 milion Euro.
Gjithashtu, dyshohet se në këtë skemë kriminale mashtrimi janë të përfshirë persona dhe subjekte të tjera, si dhe funksionare të administratës shtetrore, për të cilat vazhdojnë hetimet dhe veprimet proceduriale për të dokumentuar të gjithë veprimtarin kriminale”, thuhej në njoftimin zyrtar.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb