Një ngjarje tragjike ka ndodhur ditën e djeshme në Lofkënd të Mallakastrës, që rezultoi me humbjen e jetës së një të riu 28-vjeçar, Besnik Veliaj.

Viktima ishte duke pastruar pusin së bashku me 33-vjeçarin Bledar Bregu, në kohën kur kanë mbetur të bllokuar.

Kjo situatë u diskutua edhe në studion e “Shqipëria Live”, së bashku me zjarrfikësin që mbeti i bllokuar dhe personat që kanë qenë në vendin e ngjarjes.

Pusi ishte 18 metra i thellë dhe se shkaktari kryesor asfiksisë së tyre ka qenë pompa me benzinë që kishin me vete.

Ata treguan se në momentin që dy djemtë kanë hyrë në pus nuk kanë pasur asnjë person afër dhe më pas kanë marrë në telefon zjarrfikësit duke i kërkuar ndihmë.

Gazetarja Laureta Roshi tha se ata ishin shokë dhe se pusi ishte i vjetër, ndërsa ta kishin hyrë për të ndërruar pompën dhe për t’i vënë një pompë me benzinë.

Gazetarja u shpreh se ka intervistuar të mbijetuarin në spital, ku ai ka treguar se “pompa me benzinë bëri masë tym i bardhë, mbaj mend shokun që u fut sipër meje dhe jam përmendur në spitalin e Ballshit”.

Ajo tha gjithashtu se ambulanca është vonuar dy orë për të mbërritur në vendngjarje, dhe ka shkuar aty pa pajisjet e duhura. Sipas gazetares, të dy banorët janë nxjerrë të gjallë, por kanë marrë si ndihmë të parë vetëm oksigjenin dhe asgjë tjetër.

Disa detaje nga momenti i shpëtimit të tyre i tregoi shefi zjarrfikëses Mallakastër, Reonardo Zotaj, i cili tha se kanë qenë shtatë zjarrfikës që janë përpjekur për të shpëtuar ata.

Në momentin që zjarrfikësit kanë zbritur poshtë, të dy personat janë gjetur me shenja jete.

“Shtatë anëtarë të ekipit që i kanë shpëtuar duke rrezikuar jetën. Janë gjetur pjesërisht mbyturazi. Nuk mendoj që ka qenë shpërthim. Pompa me benzinë që do përdornin në pus, për këtë arsye janë asfiksuar. Po të kishte pompë elektrike do kishin shpëtuar”, tha Zotaj.

Por në këtë ngjarje të rëndë mbeti i lënduar edhe zjarrfikësi, Albenc Zotaj i cili ishte i pari që u përball me situatën e vështirë.

Ai tregoi se pasi ka zbritur poshtë ka shpëtuar të parin Bledar Bregun dhe më pas është rikthyer për të nxjerrë nga pusi të ndjerin Besnik Veliaj.

“Me aparat u futëm poshtë bashkë me litarë. Pashë që dy personat ishin në pus me shenja jete, komunikoja me ta”, tha zjarrfikësi.

Njëkohësisht ata treguan se ishte e pamundur që t’i nxirrnin të dy njëkohësisht sepse pusi mund të prishej dhe niveli i ujit rritej vazhdimisht./ TCH