Dogana që lidh vendin tonë me Greqinë në Kapshticë nuk do të funksionojë për disa orë gjatë mesditës së sotme.
Shkak për këtë është bërë mbyllja e doganës nga ana e palës greke. Dogana është mbyllur si pasojë e protestave të fermerëve grekë. Ata kanë bllokuar rrugën me traktorë në shenjë proteste.
Dogana e Kapshticës nuk do të punojë nga ora 11:00 – 14:00. Lajmi është bërë i ditur nga Drejtoria Rajonale e Kufirit dhe Migracionit Korçë.
“Konkretisht do të ndërpritet puna, duke filluar prej ditës së sotme, në orën 11.00 deri në orën 14.00 thuhet në njoftimin e Drejtoria Rajonale e Kufirit dhe Migracionit Korçë. Kushdo që ka planifikuar të kalojë në shtetin grek përmes kësaj pike kufitare në këtë orar, do t’i duhet të presë deri në zhbllokimin e situatës me rifillimin e qarkullimit.
Fermerët grekë protestojnë kundër reformës së pensioneve dhe sistemit të ri të tatimeve.
(e.f/BalkanWeb)