Prej tre vitesh flirton me trofeun e Champions, por pa arritur ta bëjë të tijin. Edhe në këtë sezon, Juventus ka një vend nderi mes favoritëve, por për të nderuar pritshmëritë, kampionët italianë duhet të kalojnë pengesën e parë në fazën e 1/8-ve, që mban emrin e Atletikos së Madridit.
Përballja e parë që luhet në “Wanda Metropolitan” është më e vështira, por sikur ta kishin parashikuar, drejtuesit e “Zonjës së Vjetër” morën në skuadër Kristiano Ronaldon, një ekspert në çarjen e murit mbrojtës të “Cholo Simeones”.
Portugezi ka shënuar 22 gola në sfidat kundër Atletikos dhe kërkon të vazhdojë me këtë ritëm. Këtë shpreson edhe Masimiliano Allegri, që bën llogaritë e tij për të siguruar çerekfinalet.
“Kjo është sfida e parë e vërtetë drejt finales. Duhet të kontrollojmë ndeshjen dhe të jemi të kujdesshëm në kundërsulmet e tyre. Nuk firmos për asnjë rezultat, por i kam thënë skuadrës dhe po e përsëris këtu, që është shumë e rëndësishme të shënojmë një gol. Por dy do të ishin më mirë”, ka thënë trajneri i Juventusit, që misionin e tij do t’ia besojë Kristiano Ronaldos. Portugezi dhe Paulo Dibala nisen titullarë për të ndihmuar Mandzukiç në rolin e qendërsulmuesit.
Me dy lojtarë në vijën e parë të repartit ofesniv do të përgjigjet Atletiko Madrid, pasi Diego Pablo Simeone projekton Alvaro Moratën në krah të Antuan Grizman. Gjithsesi, kjo nuk do të thotë se madrilenët do të heqin dorë nga loja e tyre klasike. Këtë e konfirmon edhe tekniku argjentinas.
“Forca e Juventusit është klubi dhe skuadra. Nuk mendoj për Kristiano Ronaldon, por për futboillistët e mi, që janë të motivuar për të bërë më të mirë. Kemi një mision dhe ndeshje si kjo kundër Juventusit na bëjnë më të fortë”, ka deklaruar Simeone, i cili duhet të presë ende për të aktivizuar nga minuta e parë Diego Kostën, me sulmuesin ende larg formës së tij më të mirë.
(balkanweb)