Përkrahje dhe kushte më të mira për boksierët shqiptarë, sidomos për ata që marrin medalje në arenën ndërkombëtare. Ky ishte premtimi i presidentit të Komitetit Olimpik Kombëtar Shqiptar, Fidel Ylli, gjatë shpërndarjes së çertifikatave të mirënjohjes për Alban Beqirin, Ardit Murjan dhe Arjol Beqirin. Kreu i olimpizmit shqiptar vuri theksin te boksieri Alban Beqiri, që edhe pse në një klimë armiqësore në Beograd, mori medalje në Kampionatin Botëror:

“Mirënjohje për Alban Beqirin, i cili në mes të Beogradit, mes vërshëllimave dhe situatës sa pazakontë të krijuar, arriti të na bëjë krenaë gjithë shqiptarët me medaljen e fituar. KOKSH do t’i mbështesë boksierët shqiptarë, duke u krijuar kushte që të stërviten edhe jashtë, gjithashtu do t’u akordohet edhe premio. Mirënjohje pa fund për këta boksierë.”

Alban Beqiri ndihet krenar për rezultatin historik të boksit shqiptar, për më tepër kur medalje u arrit në mes të Beogradit:

“Më vjen mirë që arrita të bëj krenar të gjithë shqiptarët me rezultatin historik, për më tepër në mes të Beogradit. Falënderoj të gjitha shqiptarët për mbështetjen gjatë këtyre ditëve. Premtoj se do të përpiqem të marr rezultate të tjera të mira, falë edhe mbështetjes më të madhe që do të kemi nga KOKSH dhe federata e boksit.”

Alban Beqiri

Presidenti i federatës së boksit, Florend Kalivopulli, e quajti vit të artë për boksin shqiptar, pasi për herë të parë janë marrë medalje botërore, evropiane dhe ballkanike.

“Ishte një vit i artë për boksin shqiptar, jo vetëm Beqiri, Murja dhe Zeneli, por në përgjithësi pothuajse të gjithë janë paraqitur mirë në eventet e këtij viti. Do të bëhem ‘rodhe’ në KOKSH për të kërkuar sa më mbështetje për këta kampionë, në mënyrë që marrim rezultate edhe më të mira.”

Komiteti Olimpik Kombëtar Shqiptar do të krijojë mundësinë e një stërvitje më cilësore të boksierëve elitarë, për të marrë rezultate të tjera të larta dhe medalje.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb