Duket se shifrave të çmendura që kanë ardhur nga kampionati kinez këto kohë, do t’ju vijë fundi. Qeveria e tyre ka urdhëruar sot ndalimin e pagesave të çmendura për afrimin e futbollistëve të huaj, si për t’i blerë, ashtu edhe për rrogat e tyre.

“Do të ndërmerren masa ndaj investimeve joracionale ndërsa qeveria do të rregullojë dhe kufizojë blerjet me çmime të larta dhe të bëjë kufizime të ndjeshme rreth të ardhurave të futbollistëve”, u shpreh sot një zëdhënës i Administratës Shtetërore të Sportit.

Gjithashtu sipas tij, kushdo që nuk do të përshtatet me rregullat e reja do të përjashtohet nga Superliga kineze, e cila në fakt ka shpenzuar më shumë se klubet angleze për t’u përforcuar para fillimit të sezonit të ri. Emra si Oskar dhe Tevez u transferuan përkatësisht te Shangai SIPG dhe Shangai Shenhua, duke u kthyer menjëherë ndër më të paguarit në rruzullin tokësor. Tevez është rekordmeni i ri pasi do të përfitojë 38 milionë euro në sezon, ndërsa Oskar “vetëm” 24 milionë euro, gjithsesi më shumë se sa përfitojnë aktualisht si rrogë Kristiano Ronaldo dhe Lionel Mesi.

Pa dhënë shifra të sakta, zyrtari i agjencisë që kontrollonte sportin në këtë vend, tha sot se qeveria do të vendoste “tavan” si për shifrat me të cilat mund të bliheshin futbollistët, ashtu edhe rrogat e tyre.

“Objektivi ynë duhet të jetë ndërtimi i klubeve 100-vjeçare”, tha ai, duke nënkuptuar se qëllimi nuk është ndritja sa më shpejt e futbollit kinez, por jetgjatësia e tij në nivele sa më të larta duke përfshirë lojtarë të dalë nga akademitë vendase.

(e.k/BalkanWeb)