TIRANË
Presidenti Ilir Meta publikon një tjetër video, që sipas tij, tregon shkeljet e kreut të KED, Ardian Dvorani. Duke e cilësuar si spoti i dytë në mbrojtje të Kushtetutës dhe integritetit të Gjykatës Kushtetuese, Kreu i Shtetit ngre pyetjen se “Si shpjegohet që Dvorani shkel Kushtetutën, ligjin dhe del mbi vendimet e KED dhe i rrëmben kompetencat e Presidentit?”
Ndër të tjera, Kreu i Shtetit shprehet se spoti i dytë iu jep sqarim shterues disa pyetjeve që lidhen me spotin e parë, ndërsa e akuzon Dvoranin se nuk ka publikuar 32 mbledhje të KED.
“Të dashur qytetarë, Në vijim të spotit të parë, sot autorizova publikimin e spotit të dytë zyrtar në mbrojtje të Kushtetutës dhe integritetit të Gjykatës Kushtetuese. Disa nga pyetjet që lidhen me spotin e parë, marrin një sqarim shterues përmes këtij spoti të dytë që po ndaj me ju”, shkruan Meta.
Kujtojmë se përplasja mes Ilir Metës dhe Ardian Dvoranit nisi për procesin e përzgjedhjes së anëtarëve të Gjykatës Kushtetuese, ku Presidenti e akuzoi kreun e KED se ka shkelur Kushtetutën, duke mos respektuar radhën e përzgjedhjes së emrave nga institucionet përkatëse, përkatësisht 3 nga Presidenca, 3 nga Kuvendi dhe 3 nga Gjykata e Lartë.
Pas përplasjeve të forta në distancë, Presidenti Meta paralajmëroi se do të publikonte edhe video, që sipas tij, përmbanin fakte përvëluese kundër Ardian Dvoranit.
(BalkanWeb)
