Qeveria gjermane ka arritur të nxjerrë më shumë se 21,000 ish-punonjës vendas dhe njerëz të tjerë të rrezikuar nga Afganistani që kur talebanët morën pushtetin pothuajse një vit më parë, tha të enjten ministrja e Jashtme gjermane.

Megjithatë, rreth 10,000 njerëz janë ende duke pritur për të dalë, u tha Annelena Baerbock gazetarëve në Berlin. Këta janë kryesisht njerëz në një të ashtuquajtur “listë të të drejtave të njeriut” dhe për këtë arsye janë veçanërisht në rrezik. Vetëm gjysma e këtij grupi deri më tani ka arritur të largohet nga Afganistani.

Baerbock tha se njerëzit që u larguan nga Afganistani, kryesisht përmes Pakistanit, përbëjnë rreth dy të tretat e totalit që janë miratuar për t’u pranuar në Gjermani.

Ato përfshijnë afganë të cilët ose kanë punuar për Gjermaninë si punonjës lokalë ose janë përfshirë në përpjekjet për demokracinë dhe të drejtat e njeriut në Afganistan.

Në veçanti, rreth 75% e punonjësve vendorë kanë mundur të largohen. Gjithashtu, pothuajse të gjithë shtetasit gjermanë dhe familjet e tyre janë larguar nga vendi.

Ministrja shprehu keqardhjen që kriza ekonomike dhe humanitare në Afganistan vazhdon të përkeqësohet dhe se të drejtat e njeriut po kufizohen në një shkallë masive.

“Përfundimi është se jetët e njerëzve në Afganistan janë përkeqësuar në mënyrë drastike në muajt e fundit”, tha Baerbock.

Një nga pengesat kryesore që i pengon njerëzit të largohen nga Afganistani është se talebanët kërkojnë nga ata që duan të largohen me avion të tregojnë një pasaportë, të cilën shumë njerëz në rrezik nuk e kanë. Dhe vendet fqinje këmbëngulin për viza, të cilat mund të jenë të shtrenjta dhe gjithashtu kërkojnë të kenë një pasaportë.

“Do të doja të them qartë se vështirësitë për të larguar njerëzit nga Afganistani në radhë të parë fatkeqësisht do të mbeten dhe kjo është arsyeja pse do të mbetet gjithashtu detyra jonë kryesore thjesht të ofrojmë mbështetje në terren”, tha ministrja.