Në Wembley kërkohet një mrekulli nga Shqipëria, diçka që kuqezinjtë nuk e kanë bërë kurrë më parë përballë ishullorëve. Në futboll kanë jo pak rëndësi, numrat, statistikat, apo vlera e lojtarëve në fushën e lojës, nëse marrim në konsideratë këto detaje, shanset e Shqipërisë janë thuajse zero. Pikërisht pas këtyre detajeve kapen fort edhe kompanitë e basteve të cilat nuk besojnë se ekipi i Edy Rejas do të arrijë të bëjë një mrekulli të tillë përballë “tre luanëve”.
Një fitore e mundshme e Shqipërisë sot në mbrëmje kuotohet me koeficientin 26. Edhe dëshira për të dalë të pamposhtur kjo sfidë duket e vështirë për tu arritur pasi një barazim i mundshëm kuotohet me koeficientin 8,5. Anglia shihet nga kompanitë e basteve si favorit absolut pasi një fitore e mundshme e Harry Kane me shokë vlerësohet me koeficientin 1,1. Pavarësisht këtyre shifrave, futbolli prandaj është sporti më i bukur në botë, pasi asgjë nuk është fikse, për sa kohë në fushë zbresin 11 lojtarë kundër 11 gjithçka mund të ndodh, historia na ka vërtetuar se surprizat ndodhin.
(BalkanWeb)