Autoritetet në Trikala të Greqisë po shqyrtojnë përfshirjen e një bashkëatdhetari 30-vjeçar, në rastim misterioz të vdekjes së 16-vjeçares shqiptare Maria. Hetuesit thonë se vajza e ka takuar shpesh kohët e fundit këtë person.

Fillimisht vdekja e vajzës i atribuohej vetëvrasjes për shkak të një rënie nga kisha, dosja e çështjes mbetet e hapur dhe është pasuruar vazhdimisht me informacione të reja, siç është një video në duart e policisë me lëvizjet e fundit të 16-vjeçares.

Sipas informacioneve nga RealNews, 30-vjeçari ende nuk është thirrur për të dëshmuar, por kjo do të ndodhë, pasi të mërkurën e ardhshme oficerët e policisë do të kenë në duart e tyre rezultatet nga celulari i 16-vjeçares, mesazhet dhe thirrjet që ajo kishte shkëmbyer, por edhe pikat e telefonave celularë të tjerë që u gjetën në zonë atë natë.

“Vajza jonë u vra. Ose u vra në një vend tjetër dhe ata e sollën në kopshtin e kishës, ose e ndoqën atë…”, pretendojnë prindërit e vajzës në RealNews.

“Si e ngjiti skelën gjatë natës dhe pse është gjaku i saj në shumë vende në oborr, por jo në shkallët që ndodhen afër vendit ku u gjet,” pyesin ata.

Në të njëjtën kohë, policia e Trikalas po ekzaminon video nga kamerat e sigurisë që tregojnë se Maria 16-vjeçare po shëtiste vetëm në rrugët e qytetit në orët e para të 15 korrikut.

Pak më herët, një polic 26-vjeçar e kishte lënë jashtë shtëpisë së saj. Ai kishte pasur një takim me të. Mësohet se të dy ishin njohur përmes një faqe takimesh në internet.

Videoja me lëvizjet e 16-vjeçares është regjistruar rreth orës 4:30 të mëngjesit nga kamerat e vendosura në zonën e Varousia dhe konkretisht jashtë shtëpisë së një prodhuesi të njohur të qumështit. Ky është regjistrimi i fundit, i cili tregon vajzën që po shkon drejt kodrës së Profit Ilias, ku në mëngjes u gjet e vdekur nga një kalimtar, i cili njoftoi policinë.

Në atë natë të rëndësishme, nëna e Marias ishte duke punuar për të kujdesur për një person të moshuar afër Sheshit Vouvis, ndërsa burri i saj kishte shkuar në Shqipëri, prej nga erdhi pas vdekjes së Marias.

Kur polici u largua, rreth orës 3 të mëngjesit afër shtëpisë së saj, Maria ndërroi mendje, foli në telefon dhe u drejtua drejt qendrës së qytetit.

“Vajza ime Kristina më njoftoi se Maria po vinte dhe se unë duhet të lija derën e hapur, në mënyrë që zilja të mos tingëllonte. E prisja, kur dëgjova zëra dhe ulërima nga rruga. Isha e trembur. Kam dëgjuar zërin e vajzës time. Unë dola jashtë dhe fillova të bërtisja: Maria… Maria,” tha nëna e saj për RealNews, diçka që ajo gjithashtu raportoi në polici.