NGA BRIKENA METAJ
“Gjirokastra është një ansambël që po shkon drejt rrënimit”. Ky është opinion i shkrimtarit dhe studiuesit Moikom Zeqo gjatë një forumi publik nga përfaqësues të lartë të Akademisë Shqiptare të Arteve dhe Shkencave. Zeqo mbetet kundër vendimeve të Ministrisë së kulturës duke i cilësuar të pashpjegueshme ndryshimet e listave të monumenteve të kulturës.
Studiuesi u shpreh kundër e projektit të by-pass-it të që do të ndërhyjë në qendrën historike të Gjirokastrës. Sipas tij nga studimet e kryera rezulton se realizimi i by-passit vë në rrezik strukturën gjeologjike të qytetit dhe në veçanti pjesën e kalasë, e cila edhe pa këtë ndërhyrje ka pësuar dëmtime si pasojë e tërmeteve të një viti më parë.
Sipas studiuesit Zeqo, problem emergjent sot për Gjirokastrën është ruajtja e strukturës së kësaj kalaje.
Projekti i By-Pass-it të Gjirokastrës ka ndezur debat në komunitetin vendas dhe qarqet akademike si një shkelje e ligjeve të trashëgimisë kulturore dhe shkatërrim të një pjese të zonës historike. Por pavarësisht debate të ndezura, ky projekt vijon ende të jetë ekzistent dhe shumë shpejt i zbatueshëm.
Forumi publik i organizuar nga përfaqësues të lartë të Akademisë Shqiptare të Arteve dhe Shkencave mblodhi në Gjirokastër intelektualë të cilët ndanë mendime për fusha të ndryshme si Bashkimi Europian, marrëdhëniet shqiptaro-greke, apo dhe globalizimi ne fushën e gjuhësisë.
(el.sp/BalkanWeb)
