Nisi si një bisedë me tone të larta mes dy vëllezërve, por situata devijoi dhe sot aktualisht, edhe pse kanë kaluar mbi 6 vite, vazhdon të jetë ende ai konflikt mes tyre, duke dhunuar apo kërcënuar njëri-tjetrin.

Ditën e sotme, Elidoni, një 49-vjeçar i cili ka mbërritur në studion e emisionit me “Zemër të Hapur” të gazetares Evis Ahmeti, në News24, është dhunuar dhe rrahur disa herë nga vëllai i tij, për shkak të një mosmarrëveshje pronësore të një shtëpie që motrat dhe vëllezërit firmosën që kjo shtëpi ti mbetej atij.

Por kjo marrëveshje nuk zgjati shumë, pasi vëllai i Elidonit e ka zaptuar këtë banesë dhe jetoi prej vitesh aty. Ky konflikt nisi dhe u nxit nga një komshi në afërsi të banesës, i cili sipas 49-vjeçarit ishte “molla e sherrit mes dy vëllezërve”.

Prej shumë vitesh, Elidoni jeton në qytetin e Vlorës me familjen e tij, ai nuk lejohet që të shkojë në banesën e tij që ndodhet në Tepelenë. Ai jo vetëm nuk lejohet, por edhe kërcënohet me jetë. Ai u plagos me thikë nga vëllai i tij në befasi.

Rrëfimi i Elidon Çunit:
Prindërit e mi kanë ndërruar jetë dhe ne jemi 6 fëmijë, unë jam djali i vogël i familjes dhe kam jetuar me prindërit. Jemi rritur shumë të varfër, nëna ime dhe babai ishin punëtorë dhe shumë të mirëkuptueshëm, ishin prindër autoritarë, por ne gëzonim respekt për prindërit tanë. Edhe ne si vëllezër dhe motra shkonim shumë mirë, unë me një vëlla kemi qenë në një klasë, ai kur ishte i vogël piu acid, kujtoi se po pinte ujë. Unë kam pasur shumë debulesë për të. Në 2016, nis një konflikt mes meje dhe një vëllai, unë u mërzita të them të drejtën, edhe m’u dhimbs vëllai dhe nuk e denoncova. E mbyllëm këtë histori këtu dhe e lamë me kaq.

Diskutuam për punën e shtëpive, ramë dakord me fjalë, por asaj kohe ai u fut në burg, por ne nuk dinim pse ra në burg. Ai faktikisht gjithmonë vinte i revoltuar tek unë dhe ankohej për familjen e tij, për bashkëshorten, për fëmijët. Shkuam te kunata dhe me gjithë vëllain tim tjetër pyetëm çfarë ndodhi. Mirëpo asaj kohe më merr në telefon një komshie edhe më thotë “mos bëj gabim të vish, mos shko te shtëpia e vëllait se do të akuzojë kunata për ngacmim seksual”. Që në atë kohë unë nuk kam shkuar në shtëpinë time, deri më 2018. Në këtë kohë shkuam dhe aty debatuam dhe u konfliktuam me vëllanë.

Kunata njofton policinë dhe shkojmë në komisariatin e Tepelenës, aty unë u ndjeva i neglizhuar dhe nga vapa e madhe mua më ra të fikët dhe më mori ambulanca. Vëllanë e madh nuk e takova dot, sepse filloi ky konflikti. Pas asaj situate unë u ktheva në shtëpi dhe filluam të diskutojmë me njëri-tjetrin. Filluam të firmosnim për ndarje të banesës, por i thashë vëllait që do ta ndajmë me shtesë. Ramë dakord që ta ndajmë dy dhoma unë, dy dhoma ai, por të ishim të ndarë, se dy kunata në shtëpi nuk qëndrojnë dot. Bëra punime në shtëpi dhe i vura çelësin.

(BalkanWeb)