Operatori i Sistemit të Shpërndarjes OSSH, pjesë e OSHEE , ka njoftuar pas informacioneve për përkeqësim të motit se ka ngritur grupin e gatishmërisë në dispecerinë qendrore, për menaxhimin e situatës së furnizimit në 11 rajone.
Sipas OSSH u vendosën në gatishmëri, bashkë me bazën materiale, rreth 2100 punonjës, duke nisur nga N/stacionet, e deri në nivel kabine (TU).
Nga raportimet e orës 15:00 situata e furnizimit me energji elektrike paraqitet e përmirësuar në masën 90%.
Nga 27 fidra të dalë jashtë pune (ora 07:00), aktualisht vetëm 3 kanë mbetur në regjim avarie, për të cilat po punohet intensivisht, pavarësisht kushteve të motit.
Është rikthyer energjia për 73% të konsumatorëve të prekur nga defektet. Problematika ka në zonat e thella rurale.
Pothuajse në të gjitha rajonet kemi përmirësim, deri në zgjidhje përfundimtare të problemit të furnizimit me energji. Aktualisht rajoni më i prekur është zona e Peshkopisë dhe disi Elbasani, ku reshjet e dëborës kanë sjellë probleme.
Theksojmë se për zonat problematike, raportohet rikthim të energjisë në Rrajcë – Hotolisht (Librazhd), zgjidhje e defektit në NSt Kurbnesh (Burrel), Nst Farkë (Tiranë) dhe Smokthinë (Vlorë), riparuar plotesisht difektet në rajonin Gjirokastër, si Kardhiq, Lefterhor, etj.
Gjithashtu pas problemeve në hidrovorët e Gocaj dhe Grugë Zezë (Lezhë), të cilët kanë marrë zgjidhje, aktualisht të gjithë fidrat që furnizojnë këto objekte me rëndësi (përfshi dhe spitalet) janë në punë.
(BalkanWeb)
