TIRANË
“Demokratët dëgjohen duke i nxjerrë nga kasaforta. Institucion nuk është kasaforta, është mjet personal”. Kështu deklaroi sot sekretari i Përgjithshëm i PD-së Gazment Bardhi, i cili ka përsëritur disa herë thirrjen që firmat e mbledhura për thirrjen e Kuvendit të dorëzohen zyrtarisht dhe protokollohen.
I pyetur për deklaratën e Edi Palokës se PD nuk ka protokoll, Bardhi tha se kjo është një gënjeshtër.
“PD është një institucion, ju jeni dëshmitar, ka një zyrë protokolli ku protokollohet çdo shkresë që hyn apo del nga PD. Çdo shkresë ka një numër protokolli dhe një datë, nuk besoj se i protokollon zyra tek dera. Këtë e di shumë mirë zoti Paloka. Nuk e dija që z. Paloka i ka dhënë vetes kompetencës për të qenë zyra e protokollit. Z. Paloka e di shumë mirë se ushtron funksione të larta. Kryetari i Këshillit Kombëtar është një zyrtar i lartë i PD, nuk është roje kasaforte.
Çdo rregull deri në momentin kur nuk janë miratuar akte të tjera nënstaturore, është i zbatueshëm. Ndaj ju lexova rregullat e statutit të 2009, për mbledhjen e Kuvendit Kombëtar. Rregullat nënstaturoe janë sot të aplikueshme. Procesi është i qartë, dorëzohet kërkesa me shkrim. Kjo kërkesë shqyrtohet dhe kryesia e merr në shqyrtim”, tha ai.
Bardhi theksoi se “mund të ketë në datën 11 një miting por kuvend kombëtar të PD-së ka kur atë e thërret kryesia e partisë, ¼ të anëtarëve të Kuvendit Kombëtar, ose ¼ e anëtarëve të partisë”.
“Unë nuk jam institucion që do duhet t’i provojë dikujt diçka, ka një pretendim që janë siguruar firma për thirrjen e Kuvendit Kombëtar. Deri dje bërtitej për të mbledhur Kuvendin Kombëtar dhe sot që është dita nuk ndiqet procedura. Dhe tani që nuk janë ¼ e firma dhe zëri i këtyre demokratëve duhet të dëgjohet nga institucionet e partisë. Dhe nëse janë 1/10 e delegatëve, apo anëtarëve të dalin nga aty, të protokollohen dhe t’i dërgohen kryesisë së partisë. Demokratët dëgjohen duke i nxjerrë nga kasaforta. Institucion nuk është kasaforta, është mjet personal. Unë nuk kam kasafortë në zyrën tim sepse nuk kam çfarë fsheh, secili mund të mbyllë hallet personale në kasafortë, por jo demokratët. Demokratët kanë vetëm një hall, rrëzimi një orë e më parë i regjimit të Edi Ramës”, deklaroi Bardhi.
