Kandidatja për deputete e PD, Albana Vokshi ka zhvilluar një takim me pensionistët e njësisë 9 në Tiranë.

Gjatë bisedës së zhvilluar, pensionistët i kanë shprehur Vokshit shqetësimet që kanë në lidhje me pensionet e ulëta.

Njëra prej tyre, e quajtur Vileta Isaia, i ka thënë Vokshit se merr 170 mijë lekë të vjetra pension, ndërsa ka shtuar se 70 mijë prej tyre i shkojnë për drita.
“Po të mos ishte për fëmijët që i kam jashtë, nuk do të kisha lekë për të ngrënë. Nga 170 mijë lekë pension 70 më shkojnë drita”- tregoi Violeta.

Duke vënë në dukje braktisjen e pensionistëve nga qeveria Rama, Albana Vokshi denoncoi ministren përgjegjëse sipas saj, Ogerta Manastirliu.

“Ministrja shkon shtëpi më shtëpi duke tentuar të blejë vota. Nuk e ka mendjen të kujdeset për ty e për të tjerët. Çdo gjë në funksion të karriges së një personi, Edi Ramës, që ne 25 Prill do të largohet.”- tha Albana Vokshi.

Më tej Vokshi i ka prezantuar pensionistëve, planin që ka Partia Demokratike për këtë kategori.

“Rritja e pensioneve do të jetë sa dyfishi i rritjes së çmimeve dhe asnjëherë më pak se 5% çdo vit.
Do të ulim çmimin për energjinë, duke vendosur fashat mbrojtëse të pagesave. Në 25 Prill Rama do humbas do iki në shtëpi dhe më pas do të dalë para drejtësisë. Në 25 prill të gjithë pensionistët e Shqipërisë do ja japin votën qeverise se PD me në krye Lulzim Bashën e cila ka një plan fantastik për pensionistët dhe për të gjithë të rinjtë shqiptarë në menyre që fëmijët të kthehen nga emigracioni të vijnë të punojnë në atdhe në punë të mira me rroga të mira dhe të qëndrojnë pranë familjeve të tyre. Kemi shansin të sjellim ndryshimin e madh për të gjithë shqiptarët, qeveri për pensionistët dhe për të gjithë qytetarët shqiptarë”– u shpreh zonja Vokshi.