NASA ka zbuluar planet për të testuar raketa me energji bërthamore që do të mundësojnë fluturimin e astronautëve në Mars, në një kohë shumë të shpejtë.
Nasa ka bashkëpunuar me Agjencinë e Projekteve të Kërkimit të Avancuar të Mbrojtjes të qeverisë së SHBA (Darpa), për të demonstruar një motor rakete termike bërthamore në hapësirë sa më shpejt që në vitin 2027.
Projekti synon të zhvillojë një sistem shtytës pionier për udhëtimet në hapësirë, shumë të ndryshëm nga sistemet e tanishme.
“Përdorimi i një rakete termike bërthamore mundëson kohë më të shpejtë tranziti, duke reduktuar rrezikun për astronautët. Reduktimi i kohës së tranzitit është një komponent kyç për misionet njerëzore në Mars, pasi udhëtimet më të gjata kërkojnë më shumë furnizime dhe sisteme më të fuqishme”, tha NASA në një njoftim për shtyp .
Pak muaj më parë, Nasa testoi me sukses anijen e saj kozmike Artemis si një trampolinë për në Hënë dhe në Mars, ku ka shpresa të zbarkojë njerëzit në planetin e kuq diku në vitet 2030 si pjesë e programit të saj Hënë në Mars.
Aktualisht, Nasa thotë se një udhëtim për në Mars do të zgjasë 7 muaj. Megjithatë, inxhinierët nuk e dinë ende se sa kohë mund të lihet duke përdorur teknologjinë bërthamore, por Bill Nelson, administratori i NASA-s, tha se kjo do të lejonte anijen kozmike dhe njerëzit të udhëtojnë në hapësirë të thellë me shpejtësi rekord.
Misioni Artemis 2 i NASA-s, i cili do të dërgojë njerëz rreth hënës për herë të parë në më shumë se gjysmë shekulli, është planifikuar për vitin 2024. Misioni i mëpasshëm Artemis 3, i cili mund të vijë vitin e ardhshëm, do të zbarkojë astronautët, duke përfshirë gruan e parë. në sipërfaqen e Hënës për herë të parë që nga viti 1972.
(BalkanWeb)
