NATO përkohësisht do të suspendojë aktivitetet stërvitore në Irak pas vrasjes së komandantit të Forcës Kuds të Gardës Revolucionare të Iranit, Qasem Soleimani, në një sulm ajror të SHBA-ve në Bagdad.

Ushtruesi i deytrës zëdhënës i NATO-s Dylan White tha: “Siguria e stafit tonë në Irak është thelbësore. Ne vazhdojmë të ndërmarrim masat e nevojshme paraprake. Misioni i NATO-s po vazhdon, por aktivitetet stërvitore përkohësisht janë suspenduar”.

Ai theksoi se misioni i NATO-s në Irak ka personel prej disa qindra personave dhe në kërkesë të qeverisë së Irakut, ata ndihmojnë në forcimin e forcave të Irakut dhe parandalimin e kthimit të DEASH-it.

White tha se NATO po monitoron situatën në rajon “shumë afër” dhe shtoi: “Ne mbetemi në kontakt të ngushtë dhe të rregullt me autoritetet amerikane”.

Ai gjithashtu tha se Sekretari i Përgjithshëm i NATO-s, Jens Stoltenberg, dhe sekretari amerikan i Mbrojtjes Mark Esper zhvilluan një bisedë telefonike pas zhvillimeve të fundit.

– Vrasja e Soleimanit

Vrasja e Soleimanit shënon një përshkallëzim dramatik në tensionet mes SHBA-ve dhe Iranit, të cilat shpesh kanë qenë të përkeqësuara që kur presidenti Donald Trump në vitin 2018 zgjodhi që të tërhiqte SHBA-të në mënyrë të njëanshme nga marrëveshja bërthamore që fuqitë botërore e nënshkruan me Teheranin.

Udhëheqësi suprem i Iranit, Ali Khamenei, i cili i dha Soleimanit çmimin më të lartë shtetëror vitin e kaluar, u zotua për “një hakmarrje të hidhur” si reagim ndaj vrasjes.

Soleimani ishte komandant i Forcave Quds të Gardës Revolucionare të Iranit, e cila është përkufizuar si grup terrorist nga SHBA. Grupi vlerësohet të ketë 20.000 anëtarë.//AA

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb