Inis Kraja, profesoresha dhe përkthyesja, vajza e madhe e sopranos Marie Kraja është ndarë sot nga jeta para kohe.
Ka qenë mikja dhe kolegia e saj, pedagogia Klodeta Dibra, e cila përmes një statusi në rrjetin social “Facebook”, ka ndarë lajmin e trishtë.
Përmes një statusi prekës, Dibra shkruan se është pa fjalë sot për humbjen e mikeshës.“Të kam çmuar përherë për profesionalizmin tënd, korrektesën, miqësinë pa hile, fjalët e pakta por të mençura, buzëqeshjen ‘koprrace’ por domethënëse, hijeshinë hollake të shtatit tënd, mençurinë e fisnikërinë e trashëguar nga dy prindërit e tu të mrekullueshëm, profesori i Latinishtes dhe e madhja Marije Kraja”, – ka shkruar ndër të tjera Dibra.
Statusi i plotë
U prehsh në paqe fisnikja, qytetarja Inis Kraja!
Plot vite kaluam s’bashku në Fakultetin e Gjuhëve të huaja si kolege e mikesha. Të kam çmuar përherë për profesionalizmin tënd, korrektesën, miqësinë pa hile, fjalët e pakta por të mençura, buzëqeshjen ‘koprrace’ por domethënëse, hijeshinë hollake të shtatit tënd, mençurinë e fisnikërinë e trashëguar nga dy prindërit e tu të mrekullueshëm, profesori i Latinishtes dhe e madhja Marije Kraja.
Jam pa fjalë sot, Inis.
Do rrokësh fort ata që të deshën e të kultivuan aq bukur, duke u ngjizur në amëshim.
Qofsh e Parajsës, profesoreshë e kolegia jonë Inis Kraja!
(BalkanWeb)