Më 13 prill Milani ndërroi pronësi për të kaluar në duart e kinezëve me shpresën për t’ju kthyer edhe një herë lavdisë së dikurshme. Kur ka kaluar diçka më shumë se 10 ditë, situata ka nisur të ndryshojë në klub dhe pronarët e rinj po kërkojnë të zhdukin çdo gjë nga epoka e vjetër.
E përditshmja italiane “La Repubblica” raporton se nga muret e klubit janë hequr disa foto që paraqesin sukseset më të mëdha të epokës Berluskoni. Në fakt, heqja e kujtimeve “berluskoniane” është një sinjal i qartë që klubi po kthen faqe në çdo aspekt.
Një tjetër detaj që vërteton erën e ndryshimit që ka kapluar ambientin kuqezi ishte poltrona e Adriano Galianit në tribunën VIP, ku për herë të parë pas 31 vitesh pamë të ulej administratori i ri i “Djallit”, Marko Fasone.
(e.k/BalkanWeb)
