Trajneri i Atletico Madrid, Simeone iu përgjigj pyetjeve të gazetarëve para ndeshjes ndaj PSG-së në Botërorin e klubeve.

“Liga dhe Botërori i Klubeve janë dy gjëra të ndryshme. Këtu jemi të gjithë mysafirë, përveç vendasve amerikanë. Ne do të luajmë me dëshirë, pritshmëri dhe përkushtim maksimal që kërkon ky turne. Shpresojmë të tregojmë këtë në fushë, jo vetëm me fjalë.”

I pyetur për ndryshimet në skuadër që nga ndeshja me PSG-në në Champions, Simeone u shpreh: “Ata kanë luajtur mirë atëherë dhe kishin rastet e tyre, ne ishim të fortë dhe bëmë një përpjekje kolektive të madhe. Asnjë nga dy ekipet nuk ka ndryshuar shumë që atëherë. PSG do të vazhdojë të luajë me stilin e tij, me mesfushorë të rinj dhe sulmues të fortë, nën drejtimin e një trajneri shumë të mirë. Ne do të vazhdojmë me stilin tonë, duke ditur mirë si të kontrollojmë ndeshjen.”
Për rëndësinë e kualifikimit për këtë turne pas katër viteve përgatitje, Simeone tha: “Koha do të tregojë sa e rëndësishme është kjo për Atletico Madrid si klub dhe ekip. Kjo na bën të gjithë të rritemi sportivisht dhe në nivel ndërkombëtar. Do të duhet të luftojmë që të arrijmë përsëri në këtë nivel. Barça dhe Reali janë në momente shumë të mira dhe ne shpresojmë të jemi aty edhe pas katër vitesh.”
Për mënyrën se si Atletico mund të përballojë presionin e PSG-së, ai shtoi: “Çdo ekip ka pikat e forta dhe të dobëta. Kur je shumë i fortë në një aspekt, zakonisht ke një dobësi në tjetrin. Ne do të përpiqemi të jemi të fortë në atë aspekt, sepse PSG ka treguar në Champions se është një skuadër dinamike që ushtron presion dhe kërkon të luajë në fushën kundërshtare.”

Simeone lavdëroi edhe aftësitë e trajnerit të Spanjës, Luis Enrique, duke thënë: “Luis ka treguar gjithmonë aftësinë për të bindur lojtarët, qoftë në kombëtare, qoftë në Celta apo Barça. Ai di të ndërtojë një grup ku futbollistët japin më të mirën për skuadrën.”