Pas shumë zërash në merkato, e ardhmja e Ernest Muçit duket se është vendosur. Të paktën kështu mendojnë, ose më shumë akoma, janë të sigurta mediat polake. Sulmuesi i Tiranës ka zgjedhur Legian e Varshavës për të bërë kapërcimin e madh në karrierën e tij.
Nuk bëhen të qarta shifrat e transferimit, mejithëse flitet se gjigandët e futbollit polak do të shpenzojnë rreth 1 milion euro për kartonin e 19-vjeçarit që e cilësojnë si “më të mirin e futbollit shqiptar dhe një nga talentet më të mëdhenj të Ballkanit”. E sigurt është që klubi bardheblu do të arkëtojë një shumë të konsidrueshme, pasi më parë kishte refuzuar 600 mijë euro për sulmuesin.
Duke qëndruar në atë që raportojnë mediat polake, palët kanë arritur marrëveshjen dhe po limojnë detajet e fundit për të finalizuar transferimin e Ernest Muçit në formë përfundimtare. Futbollisti do të zbresë në fushë me Tiranën për ndeshjen e së shtunës kundër Teutës, ndërsa kjo mund të jetë paraqitja e fundit për të me bardheblutë përpara se të nisë aventurën e parë europiane me skuadrën më të madhe të Polonisë.
(balkanweb)