Autoritetet e qytetit Ostrava, në Republikën Çeke, janë vënë në kërkim të një krokodili të zhdukur.
“Kërkimi për zvarranikun vazhdon”, tha sot një zëdhënëse e policisë.
“Kafsha 5-vjeçare është e shkathët dhe e aftë të ndjekë macet dhe qentë e vegjël”, shtoi ajo.
Krokodili xhuxh u arratis nga pronari i tij të shtunën, por ai e raportoi incidentin në polici vetëm disa ditë më vonë.
Ky lloj krokodili i përket specieve më të vogla të krokodilit, me origjinë nga Afrika Perëndimore.
Tani, pronari i kafshës së zhdukur po has probleme me autoritetet.
Ai e kishte regjistruar zvarranikun siç duhet, por në një qytet tjetër, Olomouc, gati 100 kilometra larg.
Jo shumë muaj më parë, në maj, zjarrfikësit që po shuanin zjarrin e rënë në një shtëpi në fshatin Klopina, u përballën me një krokodil Nili me gjatësi tre metra.