TIRANË

Policia Rrugore përgjatë javës që shkoi ka aplikuar një sërë masash ndëshkimore për drejtuesit e mjeteve, të cilët pas verifikimeve të kryera, rezultuan në shkelje të rregullave rrugore.

Përgjatë një jave  janë kapur në kushte flagrante 26 shoferë, nga të cilët 8 për drejtim mjeti në gjendje të dehur, 17 për drejtim mjeti pa leje drejtimi dhe 1 për trafikim të mjeteve motorike. Gjithashtu nga ky kontroll përgjatë rrugëve janë pezulluar mbi 100  leje drejtimi.

Njoftimi i policisë:

Policia Rrugore e Tiranës, ka ndjekur dhe zbatuar me korrektësi detyrimet e përcaktuara në Planet e Veprimit përgjatë javës dhe fundjavës që lamë pas. Kontrollet e shtuara janë fokusuar në drejtim të parkimeve të gabuara, sjelljeve në raport me sinjalizimin rrugor horizontal dhe vertikal, garave me shpejtësi, drejtimit të mjetit nën efektin e alkoolit apo në gjendje të dehur, shpejtësisë mbi normat e lejuara etj.

Në funksion të detyrave të percaktuara në Planet e Veprimit, janë kapur në kushtet e flagrancës 26 drejtues mjetesh, nga të cilët 8 për drejtim mjeti në gjendje të dehur, 17 për drejtim mjeti pa leje drejtimi dhe 1 për trafikim të mjeteve motorike. Janë pezulluar 111 leje drejtimi, nga të cilat 33 për drejtim mjeti nën efektin e alkoolit, 42 për shpejtësi mbi normat e lejuara dhe 36 për shkelje të tjera të rregullave të qarkullimit rrugor.

Janë proceduar administrativisht 25 drejtues mjetesh për gara me shpejtesi, 6 prej të cilëve u është bllokuar automjeti, pasi dyshohet për ndërhyrje dhe modifikime në sistemin e zhurmëshkarkuesit. Përgjatë javës janë proceduar administrativisht 1 767 drejtues mjetesh, për qëndrim dhe pushim të mjeteve në kundërshtim me sinjalizimin rrugor.

Si dhe janë vendosur 2 050 masa administrative për shkelje të tjera të rregullave të qarkullimit rrugor, nga këto 289 masa si rezultat i raportimit të qytetarëve në Komisariatin Dixhital dhe 74 masa nga raportimet në numrin 112. Policia Rrugore e Tiranës, falënderon qytetarët për bashkëpunim dhe i fton ata të denoncojnë në numrin 112 dhe Komisariatin Dixhital çdo shkelje të kodit rrugor, me qëllim parandalimin e aksidenteve dhe rritjen e parametrave të sigurisë rrugore.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: