Spanja është një përfaqësuese që të bën të vuash në fushë, “furitë e kuqe” me kontrollin e tyre dehës të topit, detyrojnë rivalët të vrapojnë pafund, për këtë është i vetëdijshëm Edy Reja dhe stafi i tij. Nuk është e lehtë të përgatisësh një sfidë të tillë, për këtë arsye kërkohen lojtarët më në formë.
Kuqezinjtë vijojnë përgatitjet në Barcelonë dhe atmosfera duket shumë pozitive, të gjithë lojtarët janë në dispozicion të italianit, me përjashtim të Amir Abrashit. Në ditën e tretë të grumbullimit, italiani ka shtuar dozat e ngarkesës, nga ushtrime fizike për të kaluar më pas në pjesën taktike.
Impenjimi i lojtarëve kuqezi ka qenë maksimal, të gjithë dëshirojnë të bindin Edy Reja për të fituar një fanellë titullari në këtë sfidë vitrinë.
(BalkanWeb)