Kremlini ka deklaruar sot se Ukraina nuk u është përgjigjur ofertave të presidentit rus Vladimir Putin për nisjen e negociatave të drejtpërdrejta për paqen.

Zëdhënësi Dmitry Peskov u shpreh se nisja e bisedimeve me Kievin ishte fokusi kryesor i Moskës.

“Ishte Presidenti Putin ai që tha vazhdimisht se Rusia është e gatshme, pa asnjë parakusht, të fillojë procesin e negociatave”, tha Peskov.

“Deri tani nuk kemi dëgjuar ndonjë përgjigje nga regjimi i Kievit”, u shpreh ai.

Së fundmi Putin njoftoi një armëpushim afatshkurtër me rastin e festimeve për fitoren e Luftës së Dytë Botërore, ndërsa presidenti ukrainas Volodymyyr Zelensky u shpreh se ky është një tjetër manipulim i Moskës dhe se nuk ka arsye që ndalja e luftimeve të ndodhë më herët.