Dysheku i njollosur me gjak ndodhej në bodrumin e lagësht të një hoteli të bombarduar, ku ishin vendosur trupat ruse të cilët ushtarët ukrainas i detyruan të dilnin muajin e kaluar.

Racionet e braktisura të ushqimeve të ushtrisë dhe thasët e gjumit tregonin një largim të shpejtë. Jo shumë kohë më parë, Parku Kombëtar Sviati Hory , njohur si Malet e Shenjta ishte një vend i njohur turistik.

Lufta e ka transformuar këtë zonë, dikur të qetë, në veri të rajonit të Donetskut, në një peizazh apokaliptik të mbushur me mbeturinat e zymta të pushtimit të dështuar të Rusisë.

Rrugës për në park, një tank që mbante simbolin “Z” pro-luftës të Kremlinit ishte gjysmë i zhytur në një lumë, me armën e tij duke dalë nga uji.

Aty pranë ishte një tjetër tank i shkatërruar. Erë e rëndë që vinte nga kufomat ndjehej mes pishave të larta.  Vetëm dhjetë milje larg, forcat ruse të rrethuara pjesërisht ishin ende të vendosura në Lyman, çmimi tjetër i madh në luftë.

Ndërsa zhurma e granatimeve përshkoi heshtjen e frikshme.

Ministria ruse e Mbrojtjes njoftoi sot një tërheqje nga qendra e rëndësishme hekurudhore, duke i dhënë një goditje të rëndësishme përpjekjeve të Rusisë për të kontrolluar Donbasin, zonën e minierave të qymyrit që përfshin rajonet Donetsk dhe Luhansk.

Më herët, shefi i shtabit të Presidentit Zelensky kishte postuar video të ushtarëve duke valëvitur një flamur ukrainas në periferi të qytetit.

Në përgjigje të poshtërimit, Ramzan Kadyrov, kreu me ndikim i rajonit rus të Çeçenisë, i bëri thirrje Moskës të marrë “masa më drastike”, duke përfshirë përdorimin e “armëve bërthamore me rendiment të ulët”.

Ndërkohë humbja e Lyman ekspozoi trillimin e ceremonisë të mbajtur të premten në Kremlin, pas referendumeve të rreme në katër rajone të Ukrainës.

Duke folur në sallën e zbukuruar të Shën Gjergjit të Kremlinit, Presidenti Putin i tha elitës politike të vendit të tij dhe audiencës  televizive se Rusia do të aneksonte rajonet Donetsk, Kherson, Luhansk dhe Zaporizhzhya, asnjë prej të cilave nuk kontrollohet plotësisht nga forcat ruse.

Së bashku ato janë afërsisht sa Portugalia dhe përbëjnë 15 për qind të Ukrainës.

Ukraina kishte paralajmëruar se një rrëmbim i tillë i tokës do të vriste çdo shpresë për arritjen e paqes.

Në një kërcënim të fshehtë bërthamor, Putin paralajmëroi se vendi i tij do të mbronte tokat e reja “me të gjitha forcat dhe mjetet në dispozicion”.

Megjithatë, edhe kur Putin foli në Moskë, forcat ukrainase po i afroheshin rrethimit të ushtarëve të tij në Lyman, brenda territorit që ai pretendonte.

“Mobilizimi nuk do t’i ndihmojë shumë rusët,” tha një oficer ushtarak ukrainas pranë qytetit.

Dhjetëra mijëra të rinj rusë kanë ikur jashtë vendit në ditët që kur ushtria filloi të thërriste civilët për të mbështetur përpjekjet e Kremlinit për luftë.

Shumë prej atyre që tashmë luftojnë janë dukshëm të demoralizuar.

Në Yatskivka, një fshat pranë parkut kombëtar, forcat ruse kishin braktisur armët e tyre, kutitë e municioneve dhe eksplozivët në dëshpërimin e tyre për të shpëtuar.

“Ata lanë gjithçka kur ikën,” tha Maxim, 25 vjeç, menaxher i një hoteli.

Megjithatë, raketat ruse janë ende duke shkaktuar vdekje dhe shkatërrim.

Në Sviatohirsk, qyteti më i afërt me parkun kombëtar, raketat u përplasën në një bllok apartamentesh pesë-katëshe të shtunën e kaluar, duke vrarë një grua dhe duke plagosur gjashtë persona të tjerë.

Shkatërrimi është kudo dhe do të duhen vite për të rivendosur infrastrukturën në rajon kur të ndalojnë luftimet.

Njerëzit e mbetur këtu kapen pas çdo shenje shprese.

Javën e kaluar, kambanat në manastirin e vjetër filluan të binin për herë të parë që kur trupat ruse mbërritën në maj.

Ura, nga e cila dikur besimtarët kaluan për të marrë bekimet nga priftërinjtë, u hodh në erë nga ushtria e Ukrainës për të parandaluar rusët të kalonin lumin.

Ulërima e kambanave tani mbush ajrin. “Kjo duhet të jetë një shenjë se jeta do të kthehet në qytetin tonë”, është shprehur një ukrainas.

(BalkanWeb)