Karim Benzema padiskutim që do të marrë “Topin e Artë”, por para se të kurorëzohet, ka përpara sfida të tjera, duke filluar nga ndeshjet e Ligës së Kombeve dhe Botërorin në fund të vitit.
Në një intervistë për ‘Onze Mondial’, sulmuesi i Real Madrid e përkufizon veten si lojtar, kujton fillimet e tij me skuadrën e bardhë dhe disa anekdota, duke përfshirë një “problem të vogël” me José Mourinhon.
“Unë luaj me instinkt, jam një lojtar instinktiv. Çfarë më vjen në mendje bëj në fushë, – shpjegon ai për mënyrën e tij të paraqitjes në fushë. – Nuk i them kurrë vetes: Do të luaj kundër këtij mbrojtësi, duhet të bëj këtë apo atë”.
Benzema shpjegon gjithashtu fazën e tij fillestare te Real Madridi, vështirësitë që hasi në momentet e para: “Sezoni im i parë, gjashtë muajt e parë, ishin shumë të vështirë. Isha vetëm, nuk flisja gjuhën… Pra, gjithçka ishte e ndërlikuar. Gjithashtu, kisha ardhur në një botë të re, me një ekip tjetër, me një tjetër futboll. Fatmirësisht nuk u dorëzova”.
Karim përmend edhe një moment të veçantë me Jose Mourinho: “Kam pasur një problem të vogël me José. U takuam në hotel, bëmë një bisedë, ndodhi një ditë para një ndeshjeje kundër Mallorcas. Ai nuk donte të më aktivizonte si startues në atë ndeshje. Dhe kur u grindëm, i thashë: Nesër më hidhni në fushë që në fillim, unë shënoj dhe ju bëj të fitoni ndeshjen. Të nesërmen shënova dhe fituam 1-0”.
Ronaldo është një nga lojtarët nga të cilët Karim është frymëzuar gjithmonë: “Kur e shikoja atë që bënte, përpiqesha të fokusohesha në lëvizjet e tij: driblimin, finalizimin, pasimin, trajtimin e topit. Mësova gjithçka rreth tij. Më pas të arrish të njëjtën gjë është e pamundur”.
Pavarësisht se ka një rekord plot trofe, Benzema ende ëndërron të fitojë të tjerë: “Kam ende shumë gjëra në mendjen time. Dua të fitoj më shumë tituj, më shumë Liga të Kampionëve. Me kombëtaren dua Kupën e Botës. Kjo është gjithçka që kam si ëndërr”.
(BalkanWeb)
