“BBC” publikon pesë skenarë, se si mund të përfundojë lufta në Ukrainë, e cila ka hyrë sot në ditën e nëntë dhe, ndonëse janë zhvilluar dy raunde bisedimesh mes palëve, duket se nuk ka asnjë tërheqje të Rusisë.

Ja cilët janë skenarët e kësaj lufte, sipas James Landale, korrespodent diplomatik.

Luftë e shkurtër
Rusia shton operacionet e saj ushtarake me sulme shkatërruese. Mijëra vdesin, Kievi bie, presidenti i Ukrainës vritet ose arratiset dhe Rusia instalon një regjim kukull pro-Moskës. Ky do të ishte një rezultat i paqëndrueshëm, i prekshëm ndaj kryengritjeve dhe konflikteve të ardhshme.

Luftë e gjatë
Ndoshta më shumë gjasa. Ndoshta forcat ruse ngecin, me moral të ulët dhe logjistikë të dobët. Ata mund të luftojnë për të kontrolluar edhe qytetet e pushtuara. Me kalimin e kohës, forcat e Ukrainës bëhen një kryengritje efektive, ndërsa Perëndimi vazhdon të furnizojë me armë. Ndoshta pas shumë vitesh, Rusia përfundimisht largohet.

Lufta evropiane
Putini mund të dërgojë trupa në ish-republikat sovjetike si Moldavia dhe Gjeorgjia, që nuk janë pjesë e NATO-s. Ose mund të ketë thjesht llogaritje të gabuara dhe përshkallëzim. Putini mund të rrezikonte nëse mendonte se ishte mënyra e vetme për të shpëtuar lidershipin e tij – nëse ai përballej me disfatën, ai mund të tundohej të përshkallëzohej më tej.

Zgjidhje diplomatike
Duke rënë dakord tashmë për bisedimet – edhe nëse ato nuk kanë bërë shumë përparim – Putin duket se të paktën ka pranuar mundësinë e një armëpushimi të negociuar. Nëse lufta shkon keq për të, Putini mund të gjykojë se vazhdimi është një kërcënim më i madh sesa poshtërimi për t’i dhënë fund.

Putin i rrëzuar
Mund të duket e paimagjinueshme. Megjithatë bota ka ndryshuar ditët e fundit. Nëse lufta është katastrofike për Rusinë, mund të ketë kërcënim të revolucionit popullor. Dhe nëse ata që kanë përfituar nga Putini nuk mendojnë më se ai mund të mbrojë interesat e tyre, një rezultat i tillë mund të mos jetë i pabesueshëm.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb