TIRANE- Pas inspektimit të nisur nga Ministria e Shëndetësisë dhe Mbrojtjes Sociale për verifikimin e familjeve në skemën e ndihmës ekonomike, janë lënë jashtë saj të gjithë abuzuesit e saj.
Zëvëndësministrja e Shëndetësisë dhe Mbrojtjes Sociale, Bardhylka Kospiri në një dalje publike për mediat ka bërë publike disa fakte nga këto raste abuzimi, ndër të cilat ka sjellë shembullin e një familje ku me 4 makina apo me një pagë prej 1.5 milion lekë përfitonin edhe ndihmë ekonomike.
Kështu, ajo ka thënë se pas përmbylljes së fazës së inspektimit janë lënë jashtë raste të tilla abuzive.
Sakaq, Kospiri ka thënë se aktualisht ka përfunduar faza e parë e vlerësimit të aplikuesve në skemën e ndihmës ekonomike, që po shtrihet në të gjitha qarqet e vendit, ndërsa ka theksuar se skema e re garanton që këto pagesa të shkojnë tek familjet më në nevojë.
“Për herë të parë kanë patur mundësi aplikimi 18 mijë aplikues të cilët deri dje përjashtoheshin për shkak të kritereve përjashtuese të skemës së vjetër: Nëse ndryshoje vendbanim nuk e merrje ndihmën ekonomike, sot ky kriter është hequr dhe këto familje po përfshihen në skemën e re. Sistemi i ri është transparent. Kjo skemë funksionon përmes regjistrit elektronik, i cili duke qenë i lidhur me të gjitha sistemet online, të tatimeve, zyrës së punësimit, të hipotekave, drejtorisë së transportit, sigurimet shoqërore, etj; eliminon abuzuesit, të cilët deri dje përfitonin pa të drejtë pagesën e ndihmës ekonomike dhe numri rritej artificialisht, duke bërë që fondi të copëtohej në shuma të papërfillshme për familjet që janë vërtet në nevojë”, ka sqaruar Kospiri.
Çfarë ndodh me sistemin automatik të vlerësimit?
Zv.ministrja ka shpjeguar se ky sistem nxjerr jashtë abuzuesit siç janë këto raste me 4 makina apo page 1.5 milion lekë dhe përfitonin ndihmë ekonomike. Dhe janë evidentuar mijëra raste te tilla, të cilët përfitonin ndihme ekonomike në kurriz të atyre që ishin në nevojë dhe sot e përfitojnë ndihmën ekonomike të plotë. Ajo i ka dhënë përgjigje edhe pyetjes se ku do të shkojnë këto fonde, duke deklaruar se këto të fundit do t’i përfitojnë familjet qe deri dje merrnin një pagese minimale, edhe vetëm 1 mije lekë, ndërsa sot marrin ndihmë të plotë 8 mijë lekë. Kjo e fundit, sipas zv/ministres do të thotë se me skemën e re ka vetëm ndihmë ekonomike të plotë.
“Pas fazës së parë, ka nisur verifikimi rast pas rasti nga sistemi elektronik dhe po vijohet edhe me verifikim në terren. Çdo ditë po identifikohen derë më derë të gjithë ato familje që nuk janë kualifikuar në këtë fazë. Dhe sigurisht ka familje në nevojë të cilat nuk arrijnë të plotësojnë kriteret dhe nuk përfitojnë nga skema, por këto familje nuk e humbasin mbështetjen ekonomike”, ka thënë ajo.
Më tej, Kospiri ka shpjeguar se nëpërmjet rivlerësimit ato rikthehen si pjesë e skemës duke aplikuar në bashki. Të gjitha Bashkive u është dhënë një fond prej 6% të fondit të ndihmës ekonomike për këto familje që nuk plotësuan kriteret për t’u futur në sistem. Ajo i ka bërë apel çdo familje që nuk ka fituar në këtë faze, por që realisht është në nevojë, që të paraqiten menjëherë për aplikim pranë bashkive, të cilat duhet të përdorin fondin e vënë në dispozicion për këto raste, fond i cili tashmë është dyfishuar nga 3 në 6%.
Disa nga rastet abuzive:
Qytetari D.A. nga Bashkia Korçë, përfitues i skemës së vjetër nga verifikimi u konstatua që nuk deklaronte punësimin me një pagë mujore prej 149 mijë lekë në muaj.
Qytetari A.N. nga Bashkia Peshkopi, përfitues i skemës së vjetër nga verifikimi u konstatua që familjari i tij disponon dy automjete.
Qytetari A.P. nga Bashkia Fier, përfitues i skemës së vjetër nga verifikimi u konstatua që nuk deklaronte punësimin e dy familjarëve të vet, secili me një pagë mesatare 60 000 lekë.
Qytetari A.D. banues në Bashkinë Kukës, përfitues i skemës së vjetër pas verifikimeve u konstatua që dispononte 4 automjete.
Qytetari M.S. nga Bashkia Pogradec, përfitues i skemës së vjetër nga verifikimi u konstatua që nuk deklaronte punësimin e vajzës me një pagë mujore prej 58 mijë lekë në muaj.
Qytetari G.S. banues në Bashkinë Kamëz, përfitues i skemës së vjetër pas verifikimit u konstatua se kishte kushte shumë të mira banimi (vilë dy-katëshe, si dhe dy automjete).
(BalkanWeb)
