Nga dita e sotme, një oficer i Europol do të jetë në Policinë e Shtetit. Kreu i policisë shqiptare, Ardi Veliu, tha se hapet sot zyra e oficerit ndërlidhës të Europol, duke shtuar se pa bashkëpunim me ndërkombëtarët, lufta kundër krimit të organizuar nuk do të ketë sukses.
“Hapet zyra e oficerit ndërlidhës të Europol. Inaugurimin e kësaj zyre kemi nderin ta bëjmë sot. Lufta kundër krimit të organizuar nuk do të ketë sukses, nëse nuk ka bashkëpunim me ndërkombëtarët. Bashkëpunimi është domosdoshmëri për të krijuar më shumë siguri. Policia ka kontribuar për të rritur sigurinë në vend. Europol synon të përmirësojë bashkëpunimin mes agjencive ligjzbatuese kundër krimit të organizuar”, tha Veliu.
Më tej, kryepolici Veliu renditi disa nga operacionet kryesore të Europol, në të cilat ka marrë pjesë edhe policia shqiptare.
“Gjatë 2018, nga Europol janë zhvilluar 8 operacione, ndërsa gjatë këtij muaji janë zhvilluar 3 operacione ndërkombëtare të rëndësishme, ku ishte pjesëmarrëse edhe Policia e Shtetit. Operacioni për ilaçet e falsifikuara, operacioni për trafikimin e produkteve ushqimore të falsifikuara dhe operacioni për goditjen e grupit kriminal që kishte kontrabanduar, shitur e shpërndarë drogë në SHBA. Shqipëria bën pjesë në 11 projekte analitike të Europol.
Në të ardhmen do jemi pjesëmarrës në operacione të tjera. Të gjitha këto tregojnë angazhimin dhe seriozitet e policisë në luftën kundër krimit brenda dhe jashtë vendit”, shtoi drejtori i Përgjithshëm i Policisë së Shtetit.
Fjala e Drejtorit të Përgjithshëm të Policisë së Shtetit, Ardi Veliu:
I nderuar Ministër i Brendshëm, Zoti LLESHAJ ,
Të nderuar Ambasador Luigi SORECA,
E nderuar Zonja Catherine De BOLLE,
Të nderuar Ambasadorë,
Më lejoni t’i shpreh mirëseardhjen në Drejtorinë e Përgjithshme të Policisë Shqiptare, delegacionit të lartë të EUROPOL-it si dhe kënaqësinë për prezencën e ambasadorëve në këtë takim
Bashkëpunimi me partnerët dhe me agjencitë ligjzbatuese të vendeve partnere për Policinë e Shtetit është një ndër tre prioritetet kryesore të punës së saj, pasi ne jemi të vetëdijshëm dhe të bindur se lufta kundër krimit të organizuar nuk mund të ketë sukses sado e zhvilluar të jetë një organizatë policore në rast se nuk bashkëpunon me partnerët.
Krimi i organizuar është i ndërlikuar, i shtrirë në hapësirë dhe s’njeh kufij, ngjyrë apo kombësi dhe për këtë, bashkëpunimi është domosdoshmëri për të përmbushur detyrën më kryesore, krijimin e një mjedisi të sigurt për qytetarët, biznesin dhe turistë.
Policia e Shtetit është e angazhuar për të kontribuuar në rritjen e parametrave të sigurisë publike rajonale dhe më gjerë, nëpërmjet bashkëpunimit me policitë homologe dhe agjencive ligjzbatuese partnere.
EUROPOL-i si organizatë e Bashkimit Europian për zbatimin e ligjit, synon të përmirësojë efektivitetin dhe bashkëpunimin ndërmjet agjencive ligjzbatuese të shteteve anëtare, për parandalimin dhe luftën kundër krimeve të rënda, krimit të organizuar ndërkombëtar dhe terrorizmit.
Pjesëmarrja e Policisë së Shtetit në pikat fokale të EUROPOL-it, është prioritet kryesor i Zyrës Kombëtare të EUROPOL-it në Tiranë, pasi kjo ka një rëndësi të veçantë në përmbushjen e detyrimeve strategjike të Policisë së Shtetit, të cilat rrjedhin nga Prioritetet e Qeverisë Shqiptare dhe Ministrisë së Brendshme, në kuadër të integrimit në Bashkimin Evropian.
Në këtë kontekst, asistenca e EUROPOL-it në përmirësimin e analizës së informacionit kriminal në përgjithësi, si edhe përfshirja e Policisë së Shtetit në hetimet dhe operacionet e përbashkëta, është një objektiv që ne jemi duke e ndjekur me vendosmëri dhe këmbëngulje, për të bërë të mundur luftën kundër krimit të organizuar, terrorizmit ndërkombëtar, trafikut të lëndëve narkotike dhe migracionit të paligjshëm.
Gjatë vitit 2018, nga Zyra Kombëtare e EUROPOL-it janë zhvilluar 8 operacione, ndërsa gjatë këtij 6 mujori janë zhvilluar 12 operacione.
Vetëm muajit e fundit janë zhvilluar tre operacione ndërkombëtare të rëndësishme të koordinuara dhe drejtuara nga EUROPOL, ku Policia e Shtetit ishte pjesëmarrëse njësoj si homologët e saj, konkretisht:
– Operacioni “Viribus”, për goditjen e grupeve kriminale që merreshin me trafikimit të ilaçeve falsifikuara;
– Operacioni “OPSON VIII”, për goditjen e aktivitetit kriminal të prodhimit, tregtimit, trafikimit të produkteve ushqimore dhe pijeve nën/standarde dhe të falsifikuara;
– Operacioni GOLDFINGER, i koordinuar nga EUROPOL për goditjen e një grupi të organizuar kriminal, i cili kishte kontrabanduar, shitur dhe shpërndarë armë dhe drogë në shtetet e BE-së.
Në kuadrin e bashkëpunimit me EUROPOL, Shqipëria bën pjesë në 11 Projekte Analitike nga 30 të tilla gjithsej.
Në Prill 2019, Policia e Shtetit është anëtarësuar në projektin e EMPACT OPC (Platforma Europiane Multi disiplinare kundër Kërcënimeve Kriminale, për Krimin e Organizuar kundër Pronës) dhe në të ardhmen synojmë të jemi pjesëmarrës në pikat e tjera fokale, kryesisht ato që kanë të bëjnë me trafikun e drogës si “AP COLA”, “AP CANNABIS”, “AP HERIONE” .
Të gjitha këto rezultate tregojmë edhe njëherë angazhimin, vendosmërinë dhe seriozitetin e Policisë së Shtetit në luftë pa kompromis kundër krimit të organizuar brenda edhe jashtë kufijve të vendit.
Gjatë vitit 2018 dhe 2019 janë ndjekur të gjitha procedurat për përditësimin e marrëveshjes operacionale me EUROPOL-in si edhe për nënshkrimin e marrëveshjes për vendosjen e Oficerit Ndërlidhës të EUROPOL-it pranë Policisë Shqiptare për ta çuar më përpara bashkëpunimin dhe koordinimin e punës me Zyrën Ndërlidhëse të EUROPOL, inaugurimin e së cilës, është kënaqësi ta bëjmë sot.
Të nderuar pjesëmarrës.
Përfitoj nga rasti t’ju shpreh edhe një herë, gatishmërinë e Policisë Shqiptare, për rritjen dhe forcimin e bashkëpunimit me partnerët tanë ndërkombëtarë strategjikë dhe në veçanti me EUROPOL-in.
Ju faleminderit,
(BalkanWeb)
