TIRANË-Partia Demokratike ka reaguar për ngjarjen në komunën e Shënkollit në Lezhë, ku pretendohet se është qëlluar me armë zjarri, gjatë një takimi që ka pasur deputetja e LSI-së Monika Kryemadhi në këtë zonë. Në një deklaratë për mediat, PD thotë se ngjarja është shpifje e bërë nga Monika Kryemadhi, sipas së cilës është qëlluar me armë zjarri nga makina e deputetit Bumci.

‘’Partia Demokratike dënon shpifjet e pabaza të Monika Kryemadhit ndaj deputetit Bumçi, në lidhje me një pretendim ende të pakonfirmuar edhe nga policia e vënë krejtësisht në shërbim të oligarkisë. Shpifja në adresë të deputetit Bumçi është një skenar djallëzor dhe kriminal për të nxitur tensione dhe për të çorientuar vëmendjen e opinionit publik me qëllim dhunimin e standardeve të zgjedhjeve, sepse Ilir Meta e di që e ka të sigurt humbjen në Lezhë.
Partia Demokratike distancohet me neveri të plotë nga këta skenarë kriminalë dhe i bën thirrje të gjithë anëtarëve dhe votuesve të saj në Lezhë të ruajnë gjakftohtësinë.
Ne i kërkojmë qytetarëve të Lezhës dhe përkrahësve tanë të mos ndikohen, të injorojnë skenarët e pështirë të LSI-së dhe të vazhdojnë angazhimin e tyre duke dalë masivisht të dielën në votime për një fitore të pastër e të sigurt të Partisë Demokratike dhe kandidatit tonë për Bashkinë e Lezhës, z.Fran Frrokaj.’’- thuhet në deklaratën e PD-së.

Luan Rama: Eksponentë të PD të dëshpëruar nga humbja tentojnë të prishin zgjedhjet

Lëvizja Socialiste për Integrim ka reaguar pas incidentit në fshatin Shënkoll të Lezhës, ku deputetja Monika Kryemadhi u sulmua me armë. Sekretari i Përgjithshëm i LSI-së, Luan Rama deklaroi se ngjarja është një episod në tërësinë e episodeve kriminale ku eksponentë të PD të dëshpëruar nga humbja tentojnë të prishin dhe të sabotojnë procesin zgjedhor.

“Siç keni mësuar dhe nga raportimet e medias, një ngjarje shumë e rëndë është shënuar sonte në mbrëmje në zonën elektorale të Bashkisë së Lezhës, më konkretisht, në afërsi të fshatit Rrilë në ish-komunën Shënkoll. Njerëz të armatosur, banditë, nën shoqërinë e deputetëve të Partisë Demokratike, kanë qëlluar me armë zjarri pranë makinës ku udhëtonte deputetja Monika Kryemadhi me shtabin elektoral të kandidatit për bashkinë e Lezhës, Viktor Tushaj. Natyrisht që kjo ngjarje e rëndë nuk është gjë tjetër vetëm se një rast, një episod, në tërësinë e episodeve kriminal të shfaqur gjatë ditëve të fundit ku eksponentë të Partisë Demokratike, kandidatë të Partisë Demokratike, të dëshpëruar nga humbja dhe të bindur që kanë kundër shumicën e qytetarëve shqiptarë, tentojnë të prishin, të komprometojnë dhe mundësisht të sabotojnë procesin zgjedhor me akte të tilla kriminale”, ka deklaruar Luan Rama.

Ai ka bërë të ditur se gjatë ditës së djeshme ka patur disa incidente të tilla në Bashkinë e Lezhës që janë denoncuar nga ana e kandidatit të ASHE, Viktor Tushaj dhe deputetja Kryemadhi si në polici ashtu edhe pranë misionit të vëzhguesve të OSBE-ODIHR.

“Gjatë ditës së sotme ka pasur disa incidente të tilla në Bashkinë e Lezhës.

Deputetja Monika Kryemadhi, kandidati për kryetar të Bashkisë të “Aleancës të Shqipërisë Europiane”, Viktor Tushaj, kanë denoncuar pranë Policisë së Qarkut të Lezhës, pranë Prokurorisë, pranë misionit vëzhgues të OSBE-ODIHR-it, raste të tilla duke kërkuar me këmbëngulje që deputeti i Partisë Demokratike, Aldo Bumçi dhe të gjithë drejtuesit e tjerë të Partisë Demokratike të distancohen nga veprime të tilla kriminale”, tha Sekretari i Përgjithshëm i LSI-së.

Luan Rama, në emër të LSI-së u ka bërë thirrje drejtuesve të PD-së të distancohen nga këto veprime kriminale dhe të kontribuojnë për një proces zgjedhor korrekt dhe transparent.

“Në emër të Lëvizjes Socialiste për Integrim dhe njëherë i kërkoj drejtuesve të Partisë Demokratike që të distancohen hapur, prerë dhe qartazi  nga të tilla, veprime kriminale, të distancohen dhe të dënojnë elementë kriminalë dhe të bëjnë çdo përpjekje dhe të japin çdo kontribut që procesi zgjedhor të jetë korrekt, të jetë transparent të jetë i ndershëm dhe në përputhje me parimet e OSBE/ODIHR-it”, tha ai.

Më tej sekretari i Përgjithshëm i LSI-së i ka kërkuar policisë të zbatojë detyrën dhe të kontrollojë automjetet, qoftë edhe të deputetëve.

“Nga ana tjetër, i kërkoj Policisë së Shtetit të mos hezitojë, por të bëjë detyrën në përmbushje dhe në zbatim të ligjit duke iu nënshtruar kontrollit ligjor të çdo mjeti ku udhëtojnë edhe deputetë të cilësdo parti qofshin. Të kontrollohen makinat e deputetëve sepse as deputetët dhe as makinat e tyre nuk kanë më imunitet. Imuniteti është vetëm tek vota e qytetarëve. Ata që flasin për dekriminalizimin të distancohen sa më parë nëse nuk duan të konfirmojnë që janë pjesë e drejtpërdrejtë e veprimtarisë kriminale. Prandaj edhe njëherë jo vetëm të mos hezitojnë, por të mbështesin maksimalisht Policinë e Shtetit të përmbushë detyrën e saj”, theksoi Sekretari i Përgjithshëm i LSI-së.

“Qytetarët janë të vetëdijshëm që kanë në duar fatet e tyre, fatet e vendit në zgjedhjet e 21 qershorit dhe nga rruga e tyre e Shqipërisë evropiane, nga drejtimi i duhur për të votuar Shqipërinë evropiane. Nuk mund t’i ndalojnë, nuk mund t’i trembin dhe t’i detyrojnë të tërhiqen as bandat e kriminelëve dhe as ata që pas bandave të kriminelëve me imunitetin e ashtuquajtur politik, kërkojnë të terrorizojnë qytetarët. Është ora për t’u ndarë përfundimisht nga e keqja.  E ftoj lidershipin e  Partisë Demokratike të distancohet nga të tilla veprime kriminale, t’i dënojë këto akte, t’i dënojë dhe t’i denoncojë autorët e këtyre ngjarjeve të rënda kriminale nëse duan vërtet të dëshmojnë se janë vetë të angazhuar për një proces zgjedhor korrekt, të ndershëm, transparent, evropian dhe qytetar ashtu siç i ka hije Shqipërisë anëtare e NATO-s dhe Shqipërisë kandidate për në Bashkimin Europian.

Kjo ishte deklarata që bëj në emër të Lëvizjes Socialiste për Integrim. Jemi të gatshëm dhe do të komunikojmë me ju hap pas hapi nga sot dhe deri në kurorëzimin me sukses të procesit zgjedhor për gjithçka që lidhet me zgjedhjet. Faleminderit!”, përfundoi deklaratën Luan Rama.

(d.d/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb