SHKODER – Mbrëmjen e së shtunës Kalaja e Rozafës u ndriçua nga ngjyrat e Shqipërisë në ekspozitën “Colours of Albania”.
Ndryshe nga vitet e tjera, këtë vit Shqipëria plot ngjyra dhe bukuritë e saj u ekspozuan pikërisht në Shkodër, në Kalanë që këtë vit ka pasur mijëra vizitorë. Një sit historik ku estetika dhe kujdesi i dikurshëm në detaj ndaj së bukurës frymëzon krijimtarinë e brezave të sotëm.
Festës së ngjyrave në ekspozitën me 40 prej 35 mijë fotove, që u publikuan për 6 muaj rresht në “Colours of Albania”, iu shtua dhe muzika e Shpat Dedës për të promovuar më së miri vendin. Kjo përkon edhe me moton e këtij viti të konkursit, “Trashëgimia kulturore dhe përkatësia europiane”.
Qëllimi i motos që përkon edhe me atë të Bashkimit Europian për 2018 ishte nxjerrja në pah e trashëgimisë materiale dhe jo materiale të shqiptarëve, ruajtjen e kësaj trashëgimie si pjesë e ruajtjes së identitetit, por edhe si vlerë e shtuar për kontinentin ku jetojmë. Ngjyrat e Shqipërisë do të kthehet sërish vitin e ardhshëm, pasi tashmë është kthyer në një traditë të rëndësishme duke promovuar dhe përforcuar imazhin turistik të Shqipërisë.
(BalkanWeb)
