Vetëvendosje ka mbajtur sot në Prishtinë një tubim, që është cilësuar nga organizatorët si “provë për protestë” në kohën e pandemisë së koronavirusit. Ky tubim është thirrur nga Lëvizja Vetëvendosje, që udhëhiqet nga kryeministri në detyrë, Albin Kurti.
Qytetarët, kanë brohoritur dhe thirrur emrin e kryeministrit në detyrë, Albin Kurti ndërsa janë mbledhur në sheshin “Skënderbeu” në Prishtinë të organizuar nga Lëvizja Vetëvendosje.
Pas provës së parë javë më parë Lëvizja Vetëvendosje do të vazhdojë me provën e dytë të përgatitjes së protestës në sheshet e Prishtinës.
Kryeministri në detyrë i Kosovës, Albin Kurti ka dalë në ballkonin e qeverisë për të përshëndetur protestuesit në sheshin e Prishtinës. Ata nisën të brohorisnin “Duam Zgjedhje”. Në ballkonin e Kuvendit ndërkaq janë parë edhe deputetë të Lëvizjes Vetëvendosje.
Zëdhënësi i Lëvizjes Vetëvendosje, Arlind Manxhuka, mëngjesin e së enjtes ka konfirmuar për Telegrafin se sot në provë planifikojnë të jenë nga 3 mijë e 500 persona deri në 5 mijë.
Kujtojmë se në provën e parë të protestës, më 12 maj ishin përafërsisht 500 persona, të cilët ishin më maska, dorëza dhe mbanin distancë sociale. Ndryshe, edhe Policia e Kosovës do ta lejojë Lëvizjen Vetëvendosje që sot të mbajë provën e dytë të përgatitjes për protestë. Këtë e kanë bërë të ditur për Telegrafin zyra e medieve në Policinë e Kosovës.
