Gjykata e Posaçme vendosi të shtyjë seancën gjyqësore ndaj ish ministrit të Mbrojtjes, Fatmir Mediu, nën akuzë në lidhje me tragjedinë e Gërdecit, për të vendosur nëse do të legjitimojë si palë në proces familjarët e të miturit Erison Durda që humbi jetën nga shpërthimi tragjik i fabrikës së demontimit.
Trupa gjykuese vendosi të marrë mendim nga prokuroria në lidhje më këtë çështje. Zamira Durda, e cila vuri në lëvizje SPAK për këtë çështje, tha drejtësia po tallet me ta.
Avokati i familjes Durda, Dorjan Matlija tha se ka dyshime që gjykata do t’i mbajë jashtë sallës së gjyqit familjarët e viktimave.
Ardian Visha, avokat i ish-ministrit Fatmir Mediu tha se familjarët e viktimave kanë të drejtë të jenë pjesë e procesit
Ish -ministri i mbrojtjes Fatmir Mediu është marrë i pandehur për akuzat e shpërdorimit të detyrës dhe shpërdorimit të detyrës në bashkëpunim me kuadrin ushtarak komandues. Ai akuzohet nga SPAK si një nga përgjegjësit e tragjedisë së 15 marsit 2008 ku nga shpërthimi I punishtes së demontimit, në Gërdec humbën jetën 26 persona dhe u plagosën qindra të tjerë. gjyqtari paraprak do të vendosë në seancë paraprake për fatin e dosjes së Fatmir Mediut, nëse do ta kalojë ose jo për shqyrtim në themel.