Një gadishull artificial do të ndërtohet në portin e Kopenhagës, pas miratimit të një ligji nga parlamenti danez që lejon ndërtimin e tij në Oresund.

Gadishulli, i quajtur Lynetteholm, është për të mbrojtur qendrën e qytetit të Kopenhagës nga përmbytjet dhe për të krijuar hapësirë ​​jetese për 35 000 banorë.

Gadishulli do të ndërtohet midis Refshaleoen dhe Nordhavn.

Ministri i Transportit, Benny Engelbrecht tha në një deklaratë se “puna pritet të fillojë këtë vit”.

Përfundimi është planifikuar për vitin 2070, sipas faqes në internet të projektit.

Gadishullit prej tre kilometrash katrorë do t’i duhen 80 milionë tonë dhé, si edhe 28 milionë metra kub rërë për t’u mbushur.

Sipas Korporatës daneze të Transmetimit, kjo do të thotë që 350 kamionë do të duhet të kalojnë nëpër qytet për në vendin e ndërtimit çdo ditë për 10 vitet e ardhshme.

Protestuesit u mblodhën para parlamentit danez sot në mëngjes për të protestuar kundër projektit.

Sipas tyre, pasojat për mjedisin nuk janë studiuar sa duhet.