Këtu racistët nuk hanë. Është ky mesazhi refuzues i një restoranti të njohur italian në qendër të Berlinit, drejtuar udhëheqjes së partisë së krahut të djathtë populist dhe ekstremist ”Alternativa për Gjermaninë” (AfD), që kërkoi të rezervonte një tryezë.

“Nuk na pëlqen t’u shërbejmë politikanëve, të cilët diskriminojnë njerëzit në bazë të origjinës së tyre, fesë dhe pozitave politike”, thuhet në mesazhin me të cilin restoranti iu përgjigj kërkesës për rezervim, e cila u hodh në Twitter nga zëdhënësi i AfD-së në Bundestag, Christian Luther.

Sipas shtypit, udhëheqësve të partisë populiste të krahut të djathtë Alexander Gauland, Alice Weidel, Joerg Meuthen, Bernd Baumann dhe zëdhënësit të grupit iu mohua një vend në ”Bocca di Bacco”, një nga restorantet më të njohura italiane në kryeqytetin gjerman.

Sipas zëdhënësit të partisë, vendimi i restorantit konsiderohet si jodemokratik.

Pronari i restorantit nuk ka bërë asnjë koment dhe u ka kërkuar punonjësve të mos bëjnë deklarata mbi këtë çështje. (Atsh)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb