Organizatorët e Lojërave të Piong Çangut dhe organizata koreane e shëndetit publik kanë krijuar një grup pune për të penguar përhapjen e norovirusit. Mbi 100 vetë janë prekur nga ky virus që shkakton probleme të sistemit të tretjes. Organizatat e shëndetit thonë se po vënë në karantinë personat e infektuar, po dizinfektojnë zonën dhe po informojnë publikun mbi masat që duhet të marrin për të mos lejuar përhapjen e infeksionit.

Organizatorët e Olimpikeve dimërore kanë vënë në karantinë mbi një mijë punonjës pasi analizat treguan se ishin prekur nga norovirusi, një infeksion i sistemit të tretjes që shkakton shqetësime në stomak, të vjella dhe diarre.

“Norovirusi është një virus shumë ngjitës, mund të përhapet thjesht me prekje”, thotë Dr. Cynthia Sears.

Virusi mund të mbijetojë për ditë, madje edhe javë të tëra mbi një numër sipërfaqesh dhe mjafton një kontigjent i vogël për të infektuar dikë.

“Përhapet edhe nga të vjellat, pasi mikrobi mund të lëvizë në një farë mase përmes ajrit. Nga stërkalat e të vjellave njerëzit mund të marrin një kontigjent të mjaftueshëm që i infekton. Përhapet përmes jashtëqitjes, nëse ka ndotje të tillë”, thotë Dr. Sears, raporton VOA.

Virusi përhapet me shpejtësi mes njerëzve, sidomos atyre në mjedise të mbyllura si në anije turistike apo në shtëpi pleqsh. Mund të përhapet në turma njerëzish.

Norovirusi mund të përhapet edhe përmes ushqimit apo ujit të ndotur, nëse personi që përgatit ushqimin apo sjell ujin është i infektuar.

Simptomat zgjasin vetëm pak ditë, më pas pacienti kalon një periudhë plogështie. Mënyra për ta luftuar është higjiena: larja me kujdes dhe shpesh e duarve; dizinfektimi i sipërfaqeve që mund të jenë infektuar sidomos në ambiente gatimi dhe banjo dhe duke mos prekur fytyrën me duar. Nëse ndiqen këto masa, sportistët do të kenë mundësi ta përqëndrojnë vëmendjen tek garat olimpike.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb