Papa Françesku u takua të shtunën me mijëra refugjatë dhe grupe bamirëse në ndihmë të tyre dhe në përpjekje për të mbështetur rrugë të ligjshme emigracioni drejt Europës, kjo si një alternativë ndaj trafikut të paligjshëm.

Sipas tij emigrimi i paligjshëm e ka kthyer detin Mesdhe në një “varrezë”. Gjithashtu Papa Françesku tha se korridoret humanitare që janë krijuar në Itali që nga viti 2016 kanë shpëtuar jetë dhe kanë ndihmuar emigrantët e rinj të ambientohen.

“Korridoret humanitare nuk synojnë vetëm sjelljen e refugjatëve në Itali apo vende të tjera europiane duke i shpëtuar nga situata që paraqesin rrezik, pasiguri dhe pritje të pafundme, por ndihmojnë edhe në integrimin e tyre”, tha ai.
Organizata bamirëse “Sant’Egidio”, Federata e Kishave Evangjeliste dhe kisha “Waldensian” përhapën në Itali nismën humanitare për transferimin, që ka sjellë në Europë më shumë se 6000 njerëz, tha Papa Françesku.

Familje nga Siria, Afganistani, Ruanda dhe Ukraina ishin në auditorin e Vatikanit për t’u takuar me Papën.

“Ishte e rëndësishme për mua të vija këtu për t’i treguar botës se korridoret humanitare janë një nga gjërat më të bukura që kjo botë ka për të ofruar për njerëzit që meritojnë siguri dhe dinjitet”, tha Oliver Chris I. Kabalisa, një 22-vjeçar nga Ruanda. “Sepse si refugjatë, ne nuk e lëmë vendin tonë sepse duam, por sepse jemi të detyruar ta bëjmë këtë”. Refugjatja afgane Nazani Shakvulla tha se gratë në vendin e saj po vuajnë. Atyre u ndalohet arsimimi dhe puna./VOA

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb