TIRANË
Kreu i PBDNJ Vangjel Dule, i dalë deputet në listat e PD ka preferuar dje të veprojë ndryshe nga grupi demokrat, i cili grisi fletët e votimit për kryetaren e parlamentit Lindita Nikolla. Ai u pa në seancë që të votonte, teksa nuk u zbulua nëse vota e tij ishte pro apo kundër Nikollës.
Ka qenë vetë Dule që ka sqaruar sot me anë të një mesazhi se vota e tij ka qenë kundër kandidaturës së Lindita Nikollës.
“Me gjithë deklaratën time të qartë dje pas përfundimit të punimeve të Kuvendit, në prani të shumë mediave, ende vazhdon të përhapet një tymnajë mediatike e pakuptimtë. Ashtu siç pata kurajon publikisht të diferencohem, për arsye konceptimi të ndryshëm, nga shumica e kolegëve opozitarë në mënyrën e votimit, për më tepër nuk më mungon ajo ta pohoj po publikisht, në respekt të së drejtës së qytetarëve për të ditur të vërtetën që tentohet të shtrembërohet qëllimisht, pavarësisht se nuk është etike në rastin e votës së fshehtë, se vota ime ishte kundër kandidaturës së Zonjës Nikolli”, deklaron Dule.
Ndërkohë që sipas Kuvendit, Znj. Nikolla, u zgjod kryetare e Kuvendit pas një votimi ku morën pjesë 137 deputetë, nga 83 vota të vlefshme siguroi 79 vota pro dhe 4 kundër. Kujtojmë se LSI deklaroi 4 votat e saj kundë Nikollës.
