Shtetet e Bashkuara nuk do të marrin pjesë në takimet e G20 në të cilat po merr pjesë Rusia, tha të mërkurën Sekretarja e Thesarit e SHBA-së, Janet Yellen.

Duke folur në Komitetin e Shërbimeve Financiare të Dhomës së Përfaqësuesve, Yellen tha se ajo ua kishte bërë të qartë këtë pozicion ministrave të tjerë të financave në grup.

“Presidenti Biden e bëri të qartë, dhe unë sigurisht jam dakord me të, se nuk mund të jetë biznes si zakonisht për Rusinë në asnjë nga institucionet financiare,” tha Yellen. “Ai ka kërkuar që Rusia të hiqet nga G20 dhe unë ua kam bërë të qartë kolegëve të mi në Indonezi se ne nuk do të marrim pjesë në një numër takimesh nëse rusët janë atje”.

Biden tha gjatë një konference shtypi në Bruksel muajin e kaluar se Rusia duhet të përjashtohet nga G20, por do të duhet të ketë marrëveshje midis anëtarëve të tjerë për të zyrtarizuar masën.

Samiti i ardhshëm i liderëve të G20 është caktuar për në nëntor në Indonezi. Ka takime ministrore përpara atij takimi.