Brazili po përballet me “një tragjedi” të shkaktuar nga “një valë e re” e pandemisë Covid-19, sipas Organizatës Botërore të Shëndetësisë.

“Për fat të keq, është një tragjedi që Brazili po përballet përsëri me të gjitha këto, është e vështirë. Kjo duhet të jetë vala e katërt me të cilën përballet Brazili”, ka thënë Mike Ryan, drejtori i Urgjencave i OBSH-së.

Ryan vlerësoi sistemin brazilian të shëndetit publik dhe veprimin e shtetit për të kundërshtuar përhapjen e coronavirusit por theksoi se është i nevojshëm kontrolli i transmetimit në të gjithë vendin.

“Brazili ka shumë objekte të shquara të shëndetit publik. Unë besoj se vendi di çfarë të bëjë dhe shumë shtete po përpiqen të zbatojnë masat më të mira. Por nuk është e lehtë pasi nuk ka ndonjë pjesë të vendit që nuk është prekur seriozisht nga pandemia”, sipas Ryan.

Trendi në rritje i vdekjeve dhe infeksioneve të Covid-19 në Brazil “duhet të jetë një paralajmërim për të gjithë botën, pandemia nuk ka mbaruar dhe çdo relaksim është i rrezikshëm”, shtoi ekzekutivi i OBSH-së.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: