Arabia Saudite ka bërë një superofertë për organizimin e Superkupës së Italisë. Lega Serie A i është bërë një propozim tepër tundues prej 138 milionë eurosh për një marrëveshje 6-vjeçare, deri më 2028-2029, për zhvillimin e Superkupës së Italisë në këtë vend të pasur.

E thënë ndryshe, arabët ofrojnë 23 milionë neto për çdo sezon të kësaj finaleje (shteti pritës do të paguante edhe shpenzimet e udhëtimit dhe të akomodimit). Një vlerë praktikisht tri herë më e lartë se 8 milionë eurot për sezon (finale) të kontratës aktuale.

Oferta lidhet me formatin e ri të garës, e cila do të përfshijë një turne me katër ekipe, i ngjashëm me atë të organizuar nga Spanja. Pjesëmarrës do të ishin dy të parët e klasifikuar në Serie A dhe dy finalistët e Kupës së Italisë. Turneu do të zhvillohet me tri ndeshje, dy gjysmëfinale dhe një finale.

Skuadra fituese ose një nga pjesëmarrësit e tjerë do të shkonte përfundimisht të përballej me klubin fitues të Superkupës së Arabisë Saudite. Një delegacion nga Lega Serie A, i drejtuar nga Luigi De Siervo, pritet të shkojë në Riad në ditët në vijim për të negociuar dhe tentuar të përmirësojnë kushtet e kontratës, duke rritur më tej një ofertë tashmë monstruoze.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb