Kombet e Bashkuara përshëndetën një marrëveshje të arritur nga qeveria e përkohshme siriane dhe forcat e udhëhequra nga kurdët pas përshkallëzimit të dhunshëm në rajonin bregdetar të vendit javën e kaluar, tha një zëdhënës i OKB-së.
“Ne mirëpresim marrëveshjen e nënshkruar nga qeveria e përkohshme siriane dhe Forcat Demokratike Siriane (SDF) që u zhvillua të hënën,” tha në konferencën e përditshme Stephane Dujarric, zëdhënës i Sekretarit të Përgjithshëm të OKB-së Antonio Guterres.
Geir Pedersen, i dërguari i posaçëm i OKB-së për Sirinë, shprehu shpresën e tij në një deklaratë se marrëveshja mund të mbështesë dhe të ushqejë një proces më të gjerë, të besueshëm dhe gjithëpërfshirës të tranzicionit politik, në përputhje me parimet kryesore të rezolutës 2254 të Këshillit të Sigurimit, që çon në një kushtetutë të re dhe zgjedhje të lira dhe të ndershme.
Pedersen inkurajoi gjithashtu aktorët kryesorë ndërkombëtarë, duke përfshirë Shtetet e Bashkuara, Turqinë dhe partnerët rajonalë, që të mbështesin partnerët e tyre sirianë. “Kjo përfshin mbështetjen e një armëpushimi mbarëkombëtar dhe sigurimin e kompromiseve të vërteta që mundësojnë që paqja dhe stabiliteti të mbahen në pjesën verilindore të Sirisë,” shtoi ai.
Qeveria e përkohshme siriane dhe SDF e udhëhequr nga kurdët arritën të hënën një marrëveshje për bashkimin e të gjitha institucioneve civile dhe ushtarake në rajonin e kontrolluar nga kurdët nën institucionet shtetërore, njoftoi agjencia shtetërore e lajmeve SANA.
Marrëveshja përfshinte gjithashtu dispozita për të garantuar të drejtat e të gjithë sirianëve, njohjen zyrtare të komunitetit kurd si pjesë integrale e Sirisë, një armëpushim mbarëkombëtar dhe mbrojtjen për kthimin e sirianëve të zhvendosur, thuhet në raport.
(A.A/BalkanWeb)
